Тажидин Агьмедханов

Хьайи крар кьезилвилиз элкъуьриз

Хьайи крар кьезилвилиз элкъуьриз,
Мад зи рекьер кьазва вуна, азизди,
Гьа сифте хьиз рикI тIанур хьиз ифириз,
Дамаррай экв хъвазва вуна, азизди.

Агь, лацубур алай гуьзел

Агь, лацубур алай гуьзел,
Вун хупI лацуз аквазвачни!
Ваз килигиз хьана мягьтел,
Къеневай рикI цIразвачни!

Ваз гатукай хабар хьана,
Гатфар гьеле яргъа амаз.
Заз чидач низ, сувар хьана,
ГьатдатIа вун гара аваз...