Эминат Заирбегова

Чидач ятIа кьисмет вун зи

Чидач ятIа кьисмет вун зи,
РикIиз хьанва гьакьван чими.
Килигиз кIанз вилериз ви,
Яргъал къвазмир вун, кIаниди.

РикI ачуха, багьа инсан,
Муьгьуьббатдин атайла ван.
Уьмуьрни чи жеда хъсан,
Яргъал къвазмир вун, зи масан.

Лезги руш

Гатфар я вун гуьлуьшан,
Ийимир зун перишан.
КIанда рикIиз гьамиша
Заз лезги руш, лезги руш.

ПРИПЕВ:
ЭкъечIа вун зи вилик,
Я лезги руш, лезги руш,
Муьгьуьббатни зи назик
Гуда за ваз, лезги руш.

РикIин мурад

Вучиз кана зи рикI вуна,
Ашкъидин са гъед хьиз туна,
Цавай мелек хьиз атана,
Вун акурла заз шад хьана.

Амма ашкъи куьз хкахьна,
Себебсуз вун чара хьана,
Масад кьуна, на зун туна,
Ама зун цIай рикIи кьуна.

Назпери

Назпери я гуьзел жейран,
Вун акуна, зун я гьейран.
Ви еришдихъ авач нукьсан,
Дагъда хвейи хаму жейран.

Наз гумир на, я Назпери,
Вун акурла я зун дили,
Ви рахун я дердин дарман,
Женнет-багъдин гуьзел жейран.