Докъузпара

Ви яйлахар, чуьллер кьунва цуькведи,
Чар булахар регъуьяр я некlедин.
Завай гекъиг жеда вун са Меккедив,
Вун - паклу муг - зияратдин чка я,
Динсузри кьуьк ягъай Докъузпара я.

Дугъривили хкана вун чкадал,
Ви рухвайри бубайрин рехъ хкьада,
Зегьмет чlугваз, ви тlвар виниз хкажда.
Аквазва заз: алахъунар пара я,
Женнетдин багъ - район Докъузпара я.

Мискискар къе я шегьер хьиз авадан,
Къазмаярни Демирар жезва кlубан.
Килиг садра Къалажухдиз баркаван!
Хатур гьуьрмет авайди чи ара я,
Чун са район - чи кlвал Докъузпара я.

Килиг садра куьн Къурушрин суьруьйриз,
Миграгъжуван гам хразвай гьуьруьйриз.
Гьава чанда чlугвада хупl Текийрин.
Вакай мани кхьей шаир Край я,
Чи илгьамдин чешме Докъузпара я.