Веревирдер

Жегьилдихъ, кьуьзуьдахъ сабур ахквазмач, 
Садбурун хъилерин гъал рапиналла. 
Абурлу бендедихъ абур ахквазмач, 
Мукьвадан, яргъадан мез цациналла. 
Къалар акъатзава къе багьнадилай, 
Гьалар какахьзава са тегьнедилай, 
Хуш гьиссер ахквазмач чи дегьнедавай, 
Нехишар чIур хьанвай гам табиналла. 
Кьуьгъуьр хьиз гьахьнава мукара вири, 
Рахазвай гафарал эцигиз кири. 
Майваяр харчи яз хьанватIа кIири, 
Багъларин хваларин яд сафуналла. 
Хъсанвал ая на тахьана галат, 
ТавуртIа тек садрахъ, хкудиз гъалатI,
ХукIурда рикIихъ ви, хьана гьавалат, 
Адетдин кар я им - пас ракьуналла. 
Ашкар я виридаз къе пулунин сир, 
Хьанва хьи, гзафбур нефсинин есир, 
Аялар чида заз гафун иеси, 
Итимар ава хьи, виш гафуналла. 
Кьисметдихъ галазди къугъвамир кIинтI-лаш, 
Агудмир вуна гьич чапхунни тараш, 
Гьикьван хьайитIани кIвалахар фараш, 
Виридан шелни хъвер са гъапуналла. 
Вучда бахтуникай ганвай капаваз? 
Адетдин кар хьанва рахун къаб алаз. 
Руьгь авай виш инсан жагъидач хьи ваз, 
Къе гзаф ксарин кьил руфуналла. 
РикIелай алудна икI элни уба,
Авач са гунагь кар ийизвай туба. 
Табдихъ дуван авач, на виш таб ая,
Садав къе дин гумач, сад купIуналла. 
Фикирри гатайла ви ракIар гъафил,
Дертлудиз рахада гьиссерин кфил, 
Дуьньядин адет я атунни хъфин, 
Сад даим магьфедал, сад кьепIиналла. 
Гьар жуьре инсанрив ацIанва дуьнья, 
Михьивал амачиз, кьацIанва дуьнья, 
Гьарда жезмай кьван ацанва дуьнья, 
Гьавиляй къе адан чан тавуналла.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.