Чун лекьер я

Чун лекьер я.
Лекь лагьана
Дегь ч!авара чаз парада.
Лекь лагьана
Чаз жуванда,чаз чарада.
Чун лекьерив гекъигайд я,
Кич!евилер чин тейидай.
Чаз лекьер хьиз килигайд я,
Кьил хураваз фин тейидай.
Чаз къуншуди лекь лагьана
Дагъдин синел муг ийидай.
Чаз дустуни лекь лагьана-
Цавун юкьвал руг ийидай.
Лекь лагьана
Сада хъуьрез,
Сада кич!ез.
Сада хвешиз,
Сада течиз.
Гьич чалагъан лагьанач чаз,
Цавар рам авур.
Я къузгъундин т!вар ганач чаз,
Иви хъваз гьазур.
Т!иб лагьанач чаз садани,
Вилерни кваз ич!и,мич!и.
Чаз садани рангар ч!улав,
Хуьруьз гъидай хабар ч!улав,
Пехъ лагьанач.
Чаз садани к!ек лагьанач,
Вичел къару
Такабурлу.
Ингье,ажузд
Акур ч!авуз
Хур виликна къал акъуддай.
Кьил виридлай вине кьадай.
Зайифбуруз к!уф ягъадай.
Лекь лагьана чаз вирида
Кьакьанвилер рам ийидай.
Дагъларини ,цаварини,
Чун такурла гъам ийидай.
Ц!уд лекь агъуз къузгъундилай
Вик!егь жеда лагьана чаз.
Лекь акурла чалагъанни
Муьт!уьгъ жеда лагьана чаз.
Чун вуж ят!а,
Чир хьанани
Я лезгияр?
Лекь гафуни
Куь хиялриз
Нур гъанани
Я лезгияр?
Чун дуьнядиз
Мад лекьер хьиз атун герек.
Чи дустариз,Чи душманриз
Чун лекьер хьиз
Акван герек.
Чилин винел
Чун гьар ч!авуз,
Кьил виневаз
Къекъвен герек.
Итимвилихъ
Къелкъвен герек.
Гьик!ван к!еве
Хьайит!ани,
Лап рекьидай бередани
Чун лекьер хьиз рекьин герек!