Жедач акъвазриз

Ваъ, завай вун жедач, зи яр акъвазриз!
Бес гатфарар свас хъфидай вахт яни -
Яб ганачни на билбилдин авазриз,
Билбил туна хъфин зурба бахт яни?

Ваъ, завай вун жедач, зи яр акъвазриз!
Амма къуьлуьн кьилери ваз лугьузва:
На яб гумир ви душманрин кагъазриз -
А кагъазри вун сурарал тухузва.

Ваъ, завай вун жедач, зи яр акъвазриз!
Бес и зулун дурнаяр ни кьабулда?
Тар ядай кас мехъер авай дарвазриз
Аватдачни и дагълара абурдай?

Ваъ, завай вун жедач, зи яр акъвазриз!
ХъуьтIериз таб тагудайди яр яни?
За таб гана виш жуьредин аязриз,
Тек са ваз таб хгун четин кар яни?