Лезги чIалан аламатар

Лезги чIалан аламатар чIехи я:
Дишегьлидин гафар къведа нурар хьиз.
Гекъигунар гевгьерар хьиз экуь я,
Тешпигьарни хци я лап турар хьиз.
Гагь зи чIала чинарри хьиз вишришда,
Гагь гьар са гаф вилин нагъв хьиз пашман я.
Булахди хьиз гагь вичин сес дегишда,
Лянет гудай чIавуз къван хьиз залан я.
Дишегьлидиз пайгъамбарди сирлувал
Багъишнава айгьамдалди рахунин:
Анжах чинай чир жеда ваз ферлувал
Винел патай метлеб квачир гафунин.
БалкIанди хьиз чукурда гагь чIала зи,
Саймиш тийиз сергьятарни сенгерар,
Гагь атана акьада гаф хура зи,
Гуьлледи хьиз кьатIиз рикIин жигерар.
Лезги чIалал тамам гьейран хьана зун,
Акур чIавуз дишегьли, зав лекIуьнай:
Сифте ада къалханди хьиз хвена зун,
Туруни хьиз ягъун патал гуьгъуьнай.