Шехьзава зун

Зун къурбанд хьуй квез, авайбур яргъара,
Куь язухар атана, шехьзава зун.
Гатфарин дем я билбинрин багълара.
Билбилдин сес атIана, шехьзава зун.

Куь гьахълувал, дуьзвал вучиз хьана зай,
Адалатдик кумачирни бес куь пай?
Куьн акъатай а чкайра жеч квез тай,
Куь дердияр кьатIана, шехьзава зун.

Авуна хьи фелекди зи чан мерез,
Сагъариз кIан хьайи яна кьел хирез,
Лаиллагьи-иллаллагь лугьузвай мез
Зулумкарри атIана, шехьзава зун.

Эфендияр, гьажияр хьанва дустагъ,
Сел я дидейрин, вахарин вилин нагъв,
Къуларик цIай кумач, къайи я гурмагъ.
Элдихъ рикI-жигер кана, шехьзава зун.

Мискин я зун гьахъсузвилер акунвай,
Гъафил хьана, хиялри перт авунвай,
Чара тежез, сефил гьижран чIугунвай,
Заманади гатана, шехьзава зун.

Рубрика

Ухшар макъалаяр