Волгоград шегьерда гзаф лезгияр яшамиш жезва. Дидед чIалаз икрамзавай, халкьдин адетар хуьз алахъзавай, элдин суварар санал къейдзавай чи ватанэгьлийрин эрзиман ина лезги чIалан мектеб кардик кутун тир. Чпин веледриз дидед чIал хъсандиз чирун патал галайвал ийизвай ксарин алахъунар себеб яз гила и кар гуьнгуьна гьатнава. Волгограддин Дуствилин КIвале гьар гьяддин юкъуз тарсар гузвай лезги чIалан мектеб кардик кутунва.
Тарсар гузвайди лагьайтIа, чи тIвар-ван авай къелемэгьли, вич КцIар райондай тир Гьилал Аскеров я. Вич чIехи ватанперес, маарифчи ва кхьираг Нуьреддин Шерифован хтул тир, гзаф йисара КцIар райондин газетда мухбирвиле кIвалахай, лезги, азербайжан ва урус чIаларал кхьей макъалайрални шиирралди сейли хьайи Гьилал Аскерован тарсар гзаф марагълуз физва.
И шад хабар ван хьайи чна Гьилал Аскеровахъ галаз алакъа хвена, адавай мектебдин гьакъиндай малумат гун тIалабна. Ада лагьана:
- Проектдин кьиле жегьил педагог Чимназ Арасова акъвазнава. Ада к1елзавайбур, гьак1ни тарсар гузвай муаллимар патал къулайвилер туьк1уьриз кIанз вири мумкинвилерикай менфят къачуз-ва. Курсара чирвилер къачузвайбур 20-25 яшарин рушарни гадаяр я. Абуру ч1ал чирунихъ галаз санал хайи халкьдин тарихдикай, медениятдикай, литературадикайни малуматар къачузва.
Мартдин вацра кьиле фейи тарсар Яран сувариз талукьарнавайбур тир. Майдин вацран кьилин тема лагьайт1а, лезги литературада Ватандин Ч1ехи дяведиз талукьарнавай эсерар жеда. Сабина Наврузова, Диана Юзбегова, Виктория Алимирзоева курсара актив иштиракзавайбур я.
Чи чIал чирзавайбурун кьула маса халкьарин векиларни ава. Лейла азербайжанви, Кристина къазах я. Aвайвал лагьайт1а, чIал чирунал гьалтайла абур лезгийрилай кьулухъ амукьзавач.
Ина хайи ч1ал чирун патал чара-чара чешмейрикай менфят къачузва. Абурук "Самур" газетдин "Ша лезги ч1алал рахан" т1вар алай рубрикадик квай материаларни акатзава.
Мукьвара чун патал гзаф шад вакъиа хьана. Лезги ч1алан курсариз багьа савкьватар гвай мугьманар атана. Волгограддин Дагъустандин халкьарин диаспорадин т1алабуналди республикадин образованидин министерстводи чаз лезги ч1аланни литературадин учебникар ракъурна. Диаспорадин кьил Абдулвагьаваб Желилова, Дуствилин К1валин директор Казбек Фарниева ва маса векилри улубар чав агакьарна.
«Самур» газетдин коллективди ватандай яргъарани дидед чIал вине кьазвай, ам чи веледриз рикIивай кIанарун патал алахъунар ийизвай Гьилал Аскеров хьтин чи ватанэгьлийриз баркаллагь лугьуз-ва. Волгограддин лезги чIалан гьяддин мектебдиз лагьайтIа, агалкьунар ва яргъи уьмуьр тIалабзава.
"Самур" газет
Добавить комментарий