Рикlин гафар

«Сивяй акъатзавай гаф – гъиляй ахъа хьанвай нуькІ хьиз я, ам ахъа хьайила, кьаз хъижедач», лугьудай рагьмет хьайи бубади. Сивяй акъатзавай гьар са келимадихъ вичин мана-метлеб амукьун патал, иридра алцум, муьжуьд лагьай гъилера атІутІ. Им лагьай чІал туш хьи, гьар са гаф лугьудайла, са-сад алцумиз акъуд. Лазим кІвалах ам я хьи, жув рахадалди, ва я чарче кхьидалди, вун квекай ва я никай рахазватІа, вири патарихъай хабар аваз канда. Лугьузвай гаф, кхьизвацй цІар хала-хатурдинди хьана кандач, я нубат алачиз тапанди хьана кадач. Ихтилат физвайди, чи лезги эдебиятда ва медениятда кьетІен чка кьазвай «Алам» журналдикай я. Журнал – ам лезги халкьдихъ, Ватандихъ ва чІалахъни тарихдихъ хура рикІера цІун ялав кваз кузвай рухвайрини рушари арадал гъанвай ва давамарни хъийизвай затІ я. Аллагь чпин пата хьурай. КІвале ачухдаказ лугьудай гаф-чІал, хуьре ва я пата-къерехда лугьуз жедач. Жуван кІвалихъ гьикІ аватІа, гьар са хуьруьхъ, райондихъ уьлкведихъ вичин сергьятарни ава, кьабулнавай къанунарни. Завай ачухдаказ жуван фикирар зи уьлкведа лугьуз жедатІани, абур къунши гьукуматра лугьуз хьун четин ва хаталуни я.

Гьа икІ, идалай вилик «Самур» газет акъудзавайла, чи хейлин векилриз, абурухъ хьиз зазни жуван сад-вад эсер акъуддай мумкинвал хьанай. А газетдай заз Самур вацІалай чІугунвай сергьятдин шаиррин шиирар кІелдай мумкинвал хьанай. Зун абурулай паракьван рази я. Амма «Алам» журнал майдандиз акъатайла, гьар акатай газетдилай алакь тийидай чарарин кьадар пара, чебни алай девирдин гьи журналдилай хьайитІани гуьрчег имаратар арадал атана. «Алам» журналда акъатзавай гьар са эсердиз къимет гун – заз четин я, къуй еке алимри веривердер авурай. Заз лагьайтІа, ам а кьадар бегенмиш я хьи, журнал агакьдалди, зун интернетда къекъвезва. Анай чи кьве патан стхайринни вахарин рикІерин кІусаркай кІватІнавай эсерар аквазва. Тара йиса садра бегьер гъида, «Аламдин» тарци са шумуд гъилера бегьер гъизва. Чебни гьихьтин!? Ихтилатар – цан цазвай ник хьтин яргъалди хвалар чІугвадайди хьуниз килигна, лезги демина туьнт лезги кьуьл авурди хьиз, за жуван келимаяр ихьтин цІараралди акьалтІарда:

 

«Алам» журнал – гьар са чар са къизил тир,
Чанар сагърай акъудзавай рухвайрин.
Чи тарихдиз камар къачуз кьезил тир,
ТІварар рикІел хкизва чи архайрин!

Эдебият – цуьк акъудай багъ хьтин,
Гьар нумрада чІалар авай шаиррин.
Чи алимрин, гьарма сад са дагъ хьтин,
Аламатар гзаф ава магьиррин.

Чи вахарин хразвай гьар гамуна,
Хъсан тамаш авай кьадар нехишриз!
Гьар са хиляй камар аваз камуна,
Дуьз фикир це гузвай кьадар багъишриз!

Кьве агъзурни цІукьуд лугьур йис куьне,
Афериндив акьалтІарна, масандиз.
ЦІийи сузни кІватІална хьиз гьисс куьна,
Пара шадвал гъида гьар са инсандиз!

СтІалдаллай Сажидиназ «Аламдин»,
Гьар са нумра савкьват хьтин ширин я.
Къадирлувал чириз гьар са уламдин,
Чи журналдин гьар са мана дерин я!


Сажидин,
РФ-дин Кхьирагрин КIватIалдин член,
РД-дин медениятдин лайихлу къуллугъчи
"АЛАМ" журнал

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.