Муаллим дустари адаз "Мамед муаллим", кхьирагри "Мегьамед Агъа" лугьуз эверда. Мукьувай таниш туширбуру "а кьил лацу эвежугъви кас ава гьа..." лугьунни чна гьасятда ихтилат муаллим ва шаир Мегамед Агъадикай физвайди кьатIида.
85 яшинив атана агакьна Мегьамед Агъа. Вичиз хас хесет-къилихрив яргъал уьмуьр гьалай Мегьамед Агъади 60 йисаз мукьва вахтунда пешейрин виридалайни пакди тир муаллимвиле кIвалахна.
Шиирар, гьикаяяр, мезелияр 1960 ла- гьай йисалай инихъ газет ва журналра чап жезвай Мегьамед Агъа (Мегьамедов) муаллимни я, язичини, шаир-публицистни. Чаз чидайдалай кьил жив хьиз рехи тир Мегьамед муаллим гьа и йисарилай чи газетдин актив мухбиррикайни я.
Мегьамед Агъадин юморар кIелай кIелчийрихъ хъверни акатда, хъелни. Вичин шегьре рехъ кьуна физвай, гьахъ-адалат вине кьазвай, ришветбазриз нифретзавай кьегьалрик хъвер акатда. Хъуьтуьл креслойра ацукьна виридаз акьулар гузвай, кьамар яцIу ийизвай, ришветар къачузвай, гьахъуниз тIуш гузвайбуруз чеб чир хьана кана-хъухъвада, хъел акатда. Литературада ада вичин гел парадни-пара аялрин шаир-кхьирагди хьиз тунва. Вири уьмуьр аялриз чирвилер гунив машгъул хьайи Мегьамед муаллимдиз гъвечIибурун хесетар хъсандиз чидайвиляй адан яратмишунра аялар патал кхьенвай эсерри кьетIен чка кьазва. Вич шумудни са хтулдин, штулдин чIехи буба тир адан къелемдикай лезги, азербайжан ва урус чIаларал басма хьанвай 30-далай пара ктаб хкатнава. Ибурун чIехи пай чи гележег тир аялар патал кхьенвайбур я.
9-апрелдиз Азербайжандин ва лезги кхьирагрин кIватIалрин уьзвуь тир Ме- гьамед Агъадин 85-йис тамам хьана. Адан юбилейдиз талукь цIийи ктабар Бакуда ва Магьачкъалада чапдиз гьазурнава.
Чна Мегьамед муаллимдиз чандин сагъвал, яратмишунрин рекье цIийи агалкьунар тIалабзава ва адан шииррикай са шумуд чешне чапзава.
“КцIар” газет
Добавить комментарий