Нубатдин межлис кьиле фена

Алай йисан 5-апрелдиз Бакуда "Алам" журналдин редакцияда “Марвар” литературадин кIватIалдин нубатдин межлис кьиле фена.

Мярекат адет яз кIватIалдин чIехид Гуьлалийрин Эйваза ахъайна. Ада эверуниз гьай гана атанвай Бажиханум Исаева, Дарвин Велибеков, Жалал Жалалов, Вакъиф Муьшкуьрви, Абир ЭчIехви, Римма Гьажимурадова, Бести Нифтиева, Анар Уьнуьгъви, Решад Ибрагьимов, Жавид Миграгъви, Мурад Гьажибабаев ва Магьире Шириновадиз "Куьн атуй, рагъ атуй" лагьана, межлисдиз авална.
Шаирар Бажиханум Исаевади, Вакъиф Муьшкуьрвиди, Гуьлалийрин Эйваза, Римма Гьажимурадовади чпин шиирар кIелна, Абир ЭчIехвиди вичин цIийи кьисадикай гафна, Бести Нифтиевади Билал Адилов, Келентер Келентерли ва Римма Гьажимурадовадин урус чIалаз элкъуьрнавай шиирар кIелна. “Марварин” и межлисни са литературадин ваъ, гьакIни културадин кимиз элкъвена: манидарар Магьира Шириновадини Решад Ибрагьимова чпин манийрив, чIугвар Дарвин Велибекова харусенятдикай, эзотерикадикай авур эхтилатрив мярекатдихъ ранг ктуна. “Марварин” и кIватIалдани виликанбура хьиз са тIвар-ван авай шаирарин ваъ, гьакIни жегьил шаиррин шииррикай гафна, абурикай “Алам” лезги културадин журналдин къведай тилитда чапдиз гудайбур хкягъна.
Гьа икI, “Марварин” са кIватIални карчивилелди кьиле фена. Къведай кIватIал са вацралай, адет яз сад лагьай кишдин юкъуз кьиле фида.

Анар УЬНУЬГЪВИ
Кцlар газет