“Шарвили”- сегьнеда

Операдал за 2000-йисалай кIвалахайди я. А чIавуз РД-дин Госсоветдин член тир Имам Яралиеван регьбервилик кваз ва адан вичин иштираквални аваз Ахцегьрин хуьре гьар йисуз “Шарвили” эпосдин сувар гегьеншдаказ къейд ийиз башламишна. Гьа вахтунда И.Яралиева заз “Шарвили” опера кхьин теклифна. За и лап чIехи эсердин винел ирид йисуз кIвалахна. Гила ам сегьнеламишунин карда чи операдинни балетдин театрдин вири коллективди иштиракзава. 2008-йисуз опера театрдин художественный советди ва РД-дин культурадин министерстводин художественно-экспертный комиссияди рейсадвилелди кьабулнай. Пулдин такьатар авачиз хьун себеб яз театрдин коллективдивай опера эцигунин кIвалахдив эгечIиз жезвачир. Ихьтин шартIара за театрдин директор М.Агьмедоваз чи миллиардер Сулейман Керимовавай куьмек тIалабун теклифна. Чи машгьур ватанэгьлидин патай разивилин жаваб агакьнай ва ада са кьадар пулни рекье тунай, вич чаз гележегдани куьмек гуз гьазур тирдини къалурнай. И кардал зун сергьят авачир кьван шад я. 2012-йисан октябрдилай коллектив “Шарвили” опера эцигунин кIвалахдив эгечIна. Асант тушир шартIара бегьерлудаказ зегьмет чIугур театрдин коллектив вичин тариф авуниз лайихлу я. Къе чун 19 ва 20-апрелдиз Урус драмтеатрдин чIехи залда операдин премьера кьиле фидайдакай рахазва. Театрдин яратмишунардай коллективдин руководителрин фикирдалди, тамаша жанлуди, вири терефрихъай пайгарди хьанва. Чна жуван кIвалах куьтягьнава ва ам тамашачийрин вилик гъизва. Гьелбетда, гьар са тамашадин кьадар-кьисмет, ам тамашачиди гьикI кьабулдатIа, гьадалай аслу я. Чазни театрдикай чпин фикирар лугьузвай бязи ксарин “Лезги халкьдиз вичин “Шарвили” эпосдин игит гьикьван дережада кIанзаватIа килигин чун” гафариз жаваб яз опера къалурзавай зал тамашачийрив сиве-сивди ацIанайтIа кIанзавай. Заз квехъ, жуван халкьдин тарихдин ва медениятдин къадир авай ватандашрихъ элкъвена, лугьуз кIанзава: “Чна Дагъустандин ва Россиядин вири халкьарихъ галаз жуван садвал къалурдай вахт алукьнава” “Шарвили” операдин кьисмет, гьуьрметлу тамашачияр, куьне иштирак авунилай, премьера гьикI кьиле фидатIа, гьадалай аслу жеда. Чна куьн тамашачийрин залда гуьзлемишзава, играми дустар!

Лезги газет