21-февралдиз Чипир хуьруьн юкьван мектебдани Дуьньядин Халкьарин дидед чIаларин йикъаз талукь мярекат кьиле фена.Мярекат ахъа авур мектебдин директор Даир Межидова къейдна хьи,ЮНЕСКО-дин къарардалди кьабулай и югъ халкьари халис суваринди хьиз къаршиламишда. Адан кьилин макьсад дуьньядин халкьарин чIаларин эбедивал, къадимлувал хуьн ва абур вилик тухуниз, артмишуниз майилвал авун я.
Мярекатдал рахай муаллим Мурад Исрафилова, дидед чIалан тарсар гузвай Фейзулла Хидирова чIал, эдебиятдинни марифатдин ирс, адетар, ацукьун-къарагъун несилрилай несилрал агакьарзавай, гьакIни гьар са халкьдин къакъудиз тежер надир алат хьиз, миллетрин арада алакъа хуьзвай такьат тирди къейдна.
Аялри Азербайжан ва лезги чIаларал шиирар кIелна, инсанарин уьмуьрда чIал, дидед чIалан верцIивиликай чипин фикирар лагьана.
Хайи литаратурадал,чIалал рикI алай, Азербайжандин, дуьнядин литаратура хъсан чизвай Фейзулла муалимди аялрин арада тухванвай "Дидедин чIал" тIвар алай кхьинрин конкурсдин нетижайрикай рахана. Конкур 5-8, 9-11 лагьай класра кIелзавай арада кьиле тухвана.
Гуьгъуьналлаз лап хъсан кхьинар аялрив кIелиз туна,тафаватлубуриз грамотаяр, мектебдин зерятар пешкешар гана.
Сифте чкаяр хайи чIалал шиирар кхьизвай I0 лагьай синифда кIелзавай Жале Шихмурадова ва Элина Межидовадиз (5-синиф), 2 лагьай чкаяр Зарина Мирземетова (I0-синиф), Нубар Мурсаловадиз (6-синиф), 3 лагьай чкаяр Тамам Айдунбегова (8-синиф) ва Марина Мирзелиевадиз (5-синиф) кьисмет хьана.
ЧIал вич вичелай квахьдайди туш. Ам сагьиб, иеси тир халкь амачирла квахьда-къейд хьана мярекатдал-чна чи девлетдин чIални хъсандаказ чирда, дидед чIалавни къайгъударвилив, веледвилив эгечIда.
Кцlар газет
Добавить комментарий