Аялрин рикI алай шаир

Алатай гьафтеда Республикадин аялрин кьилин ктабханада Дагъустандин алай аямдин литературада бажарагълу шаир, гьикаятчи, драматург ва публицист Абдуселим Исмаилован 65 йис тамам хьуниз талукьарнавай шииратдин межлис кьиле фена. Виридалайни хъсан тамашачияр аялар я лугьуда. Гьелбетда, гьакI я. Виридалайни хъсан яб гудайбурни, кIелдайбурни аялар я. Амма, чи фикирдалди, аялар тамашадал, ктабдал, кIелзавайдал, ихтилат, эсер ахъайзавайдал желб ийиз алакьунизни бажарагъ герек кар я. ИкI тирди чун рахазвай мярекатди субутна. Ктабханадин къуллугъчийри мярекатдиз хъсан гьазурвилер акунвай. ЧIехи залда шаирдин ктабринни журналрин выставка ачухнавай, мярекатдиз адан къелемдин дустаризни - Дагъустандин халкьдин шаир Ханбиче Хаметовадиз, композитор, РФ-дин искусствойрин лайихлу деятель Мегьамед Гьуьсейноваз, Дагъустандин халкьдин артист, шаир ва драматург Асеф Мегьманаз, филологиядин илимрин доктор, писатель Гьаким Къурбаназ теклифнавай. Межлис ктабханадин къуллугъчи ва адан кьилин тешкилатчи тир Марина Атлухановади ачухна. А.Исмаилован эсеррикай милли литературайрин отделдин заведующий Хадижат Агъаева рахана. Гуьгъуьнлай гаф Махачкъаладин етимрин интернатдай, Дагъларин уьлкведин меркездин 76-нумрадин бахчадай ва 39-нумрадин юкьван школадай атанвай аялриз гана. Абуру лезги ва урус чIаларал юбилярдин шиирар кIелна. 39-нумрадин школадин нинийрин театрдин кружокдин тербиячийри шаирдин “Акьуллу кац” шиирдин бинедаллаз гьазурнавай сегьне къалурна (муаллим Л. И.Абдурагьманова), межлисда кIватI хьанвайбур чпихъ авай артиствилин алакьунралди гьейранарна. РикIелай тефидай декьикьаяр мадни 76-нумрадин бахчадин пуд бицIекди багъишна. Абурукай кьве руш Гьаким Къурбанан хтулар тир. А.Исмаилован чIалариз М. Гьуьсейнова кхьенвай “Катмир закай, чепелукь”, мани, пианинодихъ галаз тамамарай бицIекриз хьиз, абурун бубадизни межлисдин иштиракчийри гурлу капар яна. Ахпа шаирдин яратмишунрикайни уьмуьрдин къекъуьнрикай Ханбиче Хаметовадини Мегьамед Гьуьсейнова, Асеф Мегьманани Гьаким Къурбана куьруь рахунар авуна. Абдуселим Исмаилова сифтени-сифте икьван рикIи кужумдайвал вичин шиирар кIелай аялризни абур межлисдиз гьазурайбуруз, мярекат тешкилай ктабханадин къуллугъчийриз сагърай лагьана. “Яратмишзавай касдиз вичин эсерар кIелиз, хуралай чиз, адавай са гьихьтин ятIани чирвилер ва гьиссер къачуз акунилай зурба шадвал авайди туш. Куьне зун къе зурбаз шадарна. Зун къе виридалайни бахтлу кас я”, - къейдна ада вичин рахунра.

Мегьамед ИБРАГЬИМОВ
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.