Виридаз малум я хьи, дуьньядин тlвар-ван авай писателрин, шаиррин, алимрин, философрин, арифдаррин афоризмаяр, камаллу келимаяр авай кlватlалар, камалдин энциклопедияр ктабханайра, ктабрин туьквенра чал дуьшуьш жезва.
Чи халкьдин чlехи, бажарагълу, сейли шаиррин, зарийрин эсеррани метлеблу, таъсирлу ибараяр, насигьатдин гафар гзаф ава. Зурба шаирар тир Стlал Сулейманан, Етим Эминан, Хуьруьг Тагьиран, Лезги Няметан… кхьирагар тир Расим Гьажидин, Гьаким Къурбанан ва маса хейлинбурун яратмишунрай вишералди афоризмаяр, эсерлу ибараяр, камаллу келимаяр чара ийиз жеда. Абур вири кlватl авуртlа, «Камалдин энциклопедия» арадал къведа.
Агъадихъ за бажарагълу къелемэгьли Расим Гьажидин эсеррай жагъурнавай эсерлу келимайрикай са тlимилбур газет кlелзавайбурун виликни гъизва.
К.ФЕРЗАЛИЕВ,
«Самур» газет
• Кьулухъай рахуни инсандин акьул-камалдин агъузвилин лишан къалурзава.
• Халкьдин зигьин – адан тарих я.
• Пагьливанар кlаник, квасаяр – симерал.
• Тlебиат гьамиша гьахъ я.
• И дуьнья, гьалдайдаз балкlан я, ялдайдаз – пар.
• Чи девир – кьве чин алай девир я.
• Вуна хъсанвалда – вазни хъсанвалда.
• Вуна писвалда – вазни писвалда.
• Къилих инсандин тlебиат я.
• Поэзия – дуьньядин гуьзел я.
• Кьве чин алай гафар лугьумир.
• Тарихни чlал са арабадин кьве чарх я.
• Чи чlал къадим чlални я, варлу чlални.
• Чlал хуьз алакьун – ватанпересвал я.
• Чи чlал я араб чlалавай, я туьрк чlалавай муьтlуьгъариз хьанач.
• Музыка виридалайни дурумлу къуват я.
• Инсандивай са вахтундани тlебиатдиз акси экъечlиз жедач.
• Тlебиатда къалпвал жедач.
• Акьуллу келледиз акьуллу кlвачерни кlанда.
• Теквили дагъ хьтин инсандин юкьван тар хада.
• Чlехи вацlар гъвечlи хуьлерилай башламиш жезва.
• Себеб жагъурун патал ахтармишун герек я.
• Са шумуд йисан сиягьат са камунилай башламиш жезва.
Добавить комментарий