Перейти к основному содержанию

Манияр

Перизада, гар атана,
Гар атана, экв хьайила.
Ашкъидикай манияр лагь
Вун чуьллера тек хьайила.
Сап ад яру ич гана заз
Зи уьмуьрдин бахт я лугьуз.
Алатзавач зи яр залай
К1вал-югъ жедай ват я лугьуз.
Хуьруь-к1вали шадвилерна
Чубандиз хва хьайи ч1авуз.
Къуй, циц1иди хьуй лагьана,
Гъуцари ам гайи ч1авуз.
Тарарилай тараралди
Билбилдин ван элкъвеналда.
Михьи ашкъи рик1е аваз
Яр дуьньяда къекъвеналда.
Шалбуз-дагъди кьил винизна
Муьшкуьр лацу хьурай лугьуз.
Шалбуз-дагъди кьил агъузна
Муьшкуьр къацу хьурай лугьуз.
Дегьзамандин ктабарни
Ахъайзава ашукьди къе.
Чи тарихдин ч1ехи суфра
Эк1язава ашукьди къе.
Камна элдин чирвилери
Йисарилай йисаралди.
Камна элдин чирвилери
Кьисайрилай кьисайралди.
***
Вацра вичин нек хьтин
Чин элкъуьрна чилерихъ.
Ц1арц1ар гана векьерал
Алай гимиш чигери.
Рап1рап1ар гуз акъвазна
Цава бахтлу гъетерни.
Секин хьана чуьллера
Туртурарни, къветерни.
Кас-Бубадин манийри
Лув гана мад хуьрериз,
Шегьеррилай элкъвена,
Гьахьна элдин рик1ериз.
Ц1ахурвийри баркалла
Лагьана Кас-Бубадиз.
Муьшкуьрвийри маншалла
Лагьана Кас-Бубадиз.
Кьвевардилай алахьна
Адан ширин авазар.
Сувардилай алахьна
Ирид симин агьузар.
Дагъдин суракь хабар яхъ
Вац1а авай селдивай,
Кас-Бубадин манияр –
Вичин хайи элдивай.
Фирай ширин ихтилат
Сивяй-сивиз авахьиз.
Фирай ширин ихтилат
Хуьряй-хуьруьз авахьиз.
Гьар магьалда гьар жуьре
Риваятар къекъвезва.
Гьар шегьерда, гьар хуьре
Агьвалатар къекъвезва.
Гьич алатдач рик1елай
Халкьдиз куьмек гайиди.
Гьич алатдач рик1елай
Элдал къимет гъайиди.
Чи эллерихъ авайди
Сад намус я, садни гьахъ.
Ада вичин залан тур
Хкаждайди туш нагьахъ.
Кьуру хьайи хуьлериз
Яд хкведа гатфариз.
Ша, ацукьна фикир гунн
Кас-Бубадин гафариз.
Шарвили квез чидани
Чуьнгуьрдикай тур авур?
Шарвили квез чидани
Са дагъдикай фур авур?
Квез акурай ашкъидин
Ялав рик1е гьатайди.
Квез акурай халкьари
Къалай рекье гьатайди.
Квез чир хьурай лезгийрин
Хурал хьайи хирерни.
Квез чир хьурай лезгийрин
Шегьерарни, хуьрерни.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.