Перейти к основному содержанию

Эгечlун

Дуьнья ч1ехи дуьнья я,
Гьар садахъ са дуст ава.
Дагълар рехи дагълар я,
Чубандихъ пуд дуст ава.
Сад акъвазда гишила,
Мекьилани амукьда.
Ам гьамиша варара
Ви рекьер хуьз ацукьда.
Адаз бес я ви буйругъ,
Сивяй са гаф ахъаюн.
Мал-девлетни на адал
Ихтибарда архайин.
Ви чантадихъ вил галаз,
Ви къуллугъдал акъваздай
Киц1 я а дуст вафалу,
Душмандин хам алаждай.
Вун гараллаз тухуда
Ада галат тавуна,
Зверда ада йифизни
Рекьер алат тавуна.
Пар эцига к1ани кьван,
Жувни акьах винелай.
Фида ам уф тавуна
Вуна гьалай чилелай.
Нагагь йифиз гьатайт1а
Вун душмандин пацара,
Ви дустуни акъудда
Вун дагъларай, вац1арай.
Ярдин патав фидайла,
Гьуьжетдайла майдандал,
Акьахда вун ваз муьт1уьгъ,
Халис дуст тир балк1андал.
Парцин балк1ан хъурцади,
Женгин балк1ан юргъа я.
Сад – инсандин куьмекчи,
Муькуьд – адан арха я.
Пуд лагьай дуст вахъ галаз
Жеда къизгъин женгера,
Гаф талгьана артухан,
Гьатда яргъал рекьера.
Никни цада вахъ галаз,
Векьни яда гуьнеда.
Далуни я, вилерни
Икьван ч1ехи дуьньяда.
Вун гъурчера, женгера,
Вун – яргъара жедайди.
Ам – ви к1валин сагьиб я,
Хзанни к1вал хуьдайди.
Ви гъамарни, дердерни
Ада рик1е тадайд туш.
Вун жув сидкьи хьайила,
Ада чарад кьадайд туш.
Эхь, дишегьди – свас ва паб
Вафалу дуст уьмуьрдин.
Дишегьлидин гьар са гаф
Хуш аваз я чуьнгуьрдин.
Дерт акурдаз чир жеда
Гъамлувални заланвал.
Гьар са касдихъ сир жеда
Авай вичин масанвал.
Дагълариз сел атайла,
Хуьлер фида таладихъ.
Диде даим гелкъведа
Вичин хайи баладихъ.
Дагъни падда гъилерив,
Вац1ни ада къвазарда,
Ялавдизни гьахьда ам,
Бала тадач азарда.
Югъ жедалди кьеп1ин к1ан
Муг ийида дидеди.
Бала квачир уьмуьрни
Руг ийида дидеди.
А мчи к1валин к1араб я,
А мчи к1валин дирек я.
Диде я манн, диде я,
Тарифун куьз герек я!
Бубадикай рахамир,
Ам галачиз кар жедач.
Буба кьилел аламаз
Хзандин рик1 дар жедач.
Чуьлда даим къаярик,
Марфарикни акатда.
Хзан патал бубаяр
Женгеризни аватда.
Ватан патал ц1аяра
Тахьайди, лагь, вуж ят1а?
Бубайрикай ягьанат
Рахайди, лагь, вуж ят1а?
Кас-Бубани – адан хва,
Шарвилини гьаданд я.
Халкьдин рекьел чан гана,
Ажал хиве кьадайд я.
Гзаф хьайла теклифар,
Бубадин гаф сад жеда.
Душманар вад хьайит1ан,
Дустар къанни вад жеда!
Диде тушни Шарвили
И дуьньядиз гъайиди?!
Буба тушни Шарвили
Пагьливан хьиз хвейиди?!
Дустар даим къуншидал,
Мугьман яргъа герек я.
Гьар са касдиз уьмуьрда
Вичин арха герек я.
Тамма тарни тек тахьуй,
Лагьана Кас-Бубади.
Стхадикай архани
Жагъана Кас-Бубадиз.
Четин юкъуз стха я
Ви гьарайдиз къведайди.
Шад юкъузни стха я
Ви межлисдал жедайди.
Стхадиз вах герек я,
Игит касдиз яракь хьиз.
Вахаз стха герек я
Гуьзлемишай суракь хьиз.
Вах стхадин ярашугъ,
Вах стхадин лувар я.
Стха к1валин мел ят1а,
Вах гьа к1валин сувар я.
Манияр лагь, ашукьар,
Чи эллериз ван хьурай.
Вахаз стха к1ани кьван,
Стхадиз ам к1ан хьурай.
Касс-Бубади куьтягьна
Вичин ширин манияр…
Суфрад винел эцигна
Аш к1ук1навай синияр.
Эллер кисай вахтунда
Йифни секинз акъвазда,
Дегьзамандин кьисаяр
Лугьудайла аваздай.
Лингер кутан чнани
Вилераллай ахварик.
Яб акалин иердиз
Кас-Бубадин махарихъ.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.