Пуд лагьай мах

БЕЙХАБАР ГЬУЖУМ 

Шарвилидин рик1 ала 
Элдин ширин манийрал. 
Шарвилидин рик1 ала 
Фикир дерин манийрал. 

Ацукьнава къагьриман 
Мад межлисда жегьилрин. 
Ацукьнава Шарвили 
Мад межлисда кьегьалрин. 

Акъвазнава са пата 
Жейранар хьиз рушарни. 
Хъукъурнавай як1арни 
Гъанва иниз, ашарни. 

Абуру къе лугьузва 
Гьар жегьилдиз са мани, 
Абуру къе лугьузва 
Гьар кьегьалдиз са мани. 

И вахтунда майдандал 
Ирид игит атана. 
Къизмиш хьанвай манияр 
Садлагьана ат1ана. 

Шарвилиди фагьумна 
Руквад кьунвай балк1анар. 
Шарвилиди фагьумна 
Гьекьед кьунвай мугьманар. 

- Чун Кьвевардай ви патав 
Атанвайд я, Шарвили. 
Ваз ахъайиз дердер чи 
Ракъанвайд я, Шарвили. 

Ахмиш хьанва кьуд патай 
Чи чилерал инсанар. 
Инсанар туш, инсандин 
Кус авачир душманар. 

Чук1урзава залумри 
Чи хуьрер, чи шегьерар. 
Барбат1зава ник1ерин 
Берекатлу бегьерар. 

А душманриз чидайди 
Ц1елхем-ц1ай я, ялав я. 
Акъатай кьван гумарин 
Гъиляй цавни ч1улав я. 

Ватан дарда гьатнава, 
Нагъв ала чи вилерал. 
Эцигдачни на мелгем 
Кц1ур гузвай хирерал!? 

Гаф куьтягьна итимди, 
Шарвили вич рахана. 
Кьил хкажна халкьариз 
Игитди ик1 лагьана: 

- Арадал кар алачиз 
Мехъер к1вале яс жедач. 
Ватан дарда гьатайла, 
Куьмек тийир кас жедач. 

Хабар фирай хуьрериз, 
Са к1усни геж тавурай. 
Гьар магьалдай, шегьердай 
Агъзур игит атурай. 

Агъзур-агъзур к1ват1 хьана, 
Гьар патахъай атана. 
Игит касдин мурадар, 
Къастар вири кьат1ана. 

Игитрин сан авачир 
Ватан патал атанвай, 
Леке тавур садрани 
Виждан патал атанвай. 

Гьиргьирдин ван балк1анрин 
Паласадиз чк1анвай, 
На лагь, агъзур асландин 
К1вач желеда ак1анвай. 

Къалханри нур чук1уриз, 
Рап1рап1завай ракъиник. 
Храз тунвай ракьукай 
Перемар квай ракъиник. 

Ч1емерукар къуьнера, 
Хьелер авай чантада. 
Игьтият хьун паталди 
Виш хьел авай халтада. 

Кьилер элкъвей тунпузар 
Алай гьяркьуь къуьнерал. 
Къван гадардай ц1апанар 
Авай гужлу гъилера. 

Мердвал хас я эвелдай 
Чи халкьариз виридаз. 
Кьейибуруз икрамда, 
Гьуьрметарда диридаз. 

Вири патан чилерай 
К1ват1 хьайила жегьилар, 
Лап кьадарсуз шад хьана 
Шарвилидин гуьгьуьлар. 

Гьатна рекье кьегьалар 
Кьвевар авай патахъди, 
Гьахьун патал женгера, 
Кьакьан, яргъи цлахъди. 

И чкадин тарифар 
Ван тахьайди хьайид туш. 
И чкадин гуьзелар 
К1ан тахьайди хьайид туш. 

Алаз гьуьлуьн яхадал 
Ам гьар садан дамах я. 
Адан гьар к1вал, гьар айван 
Са уст1ардин к1валах я. 

Бес гьик1 хьана Кьвевардин 
Кьакьал лацу паруяр? 
Куьз къекъвезва куьчейра 
Тарашчияр, угърияр? 

Виран хьанва бес вучиз 
Ч1ехи шегьер гьуьрметлу? 
Кесиб хьанва бес вучиз 
Ч1ехи шегьер девлетлу? 

Куьзуьбурун абурдал 
Вуж я ина хъуьрейди? 
Алчах, пехъи душмандин 
Гуж я ина хъуьрейди! 

Ик1 Шарвили къекъвена 
Вилаятра Ватандин, 
Гуьгъуьнаваз кьегьалар, 
Шарагар хьиз асландин. 

Хуьрерани хьана ам, 
Убайрани къекъвена. 
Къекъвердавай вижданда 
Кьисасдин ц1ай куьк1вена. 

Гьалтна адал бубая 
Хирер алаз кьилерал. 
Гьалтна адал дидеяр 
Накъвар алаз вилерал. 

Гьалтна адал рушарни 
Намус к1вачик акатай. 
Гьалтна адал сусарни 
К1анид гъиляй акъатай. 

Кьуранвай чил, шалам хьиз. 
Къекъведай кьван балк1анар. 
Къирмиш жезвай т1вет1ер хьиз 
Инна ажуз инсанар. 

Вили, михьи цаварни 
Кьунвай тамам ч1улавди. 
Лезет гузвай душмандиз 
Хкаж хьанвай ялавди. 

Т1имилни туш, гьелбетда, 
Душмандин сан гзаф я. 
Ят1ани, чир тавуна, 
Гьужум авун хилаф я. 

Гьужумайт1а, агъзурдан 
Ивидикай сел жеда. 
Агъзурданни дидедин, 
Бубад рик1ел гел жеда. 

Агъзур сусан вилел нагъв, 
Кьилел ч1улав шал жеда. 
Хайи чилиз, накьвадиз 
Мадни къати т1ал жеда. 

Шарвилиди дуьзмишна 
Вичин кьушун жергеда. 
Женг куьтягьун к1ан хьана 
Пагьливандин журеда. 

Санихъ чилин сагьибар, 
Тарашчияр муькуьнихъ. 
Тамарзу я инсанар 
Кьиникьихъ ваъ, экуьнихъ. 

Рази хьана Кьвевардин 
Иви хъвазвай зилияр: 
Ахмакьар я, ахмакьар, 
Гьелбетда, и лезгияр! 

Са пагьливан авай хьи 
Кьвевар кьунвай душманрихъ. 
Атанай ам яргъарай 
Гила чуни пашманриз. 

Хьайиди туш са касни 
Адан вилик экъеч1ай, 
Вири ярхар авурд я 
Ада вичив эгеч1ай. 

И патахъай Шарвили 
Фена рик1е ц1ай аваз. 
Рик1е ц1ай ваъ, накьвадин 
Гьалалвилин пай аваз. 

Руг акъатна майдандай. 
Игитди тур хкажна. 
Вил ахъайна к1евдалди 
Душмандин хам алажна. 

Ахпа кьуна гадарна 
Ам кьушунрин винелай. 
Агь акъатна душманрин 
Ч1ехидай вич-вичелай. 

Икьрар к1вачик кутуна 
Душманди мад сеферда. 
Чи кьушунрал гьужумна 
Ада вичин тегьерда. 

Сарар вичин жакьвана,  
- Агь, ягьсузар! – лагьана, 
Хкаж хьана балк1андал 
Шарвили, геж тахьана. 

Гаргарвияр аватна 
Душманд хуруз, ц1аяр хьиз, 
Утивияр авахьна 
Душманд хуруз, къаяр хьиз. 

Яргъикк1арар къарагъна, 
Ничхир акур лекьер хьиз. 
Куьревияр алт1ушна 
Душманд кьилел цеквер хьиз. 

Ц1ахурвияр алахъна 
Гьахьун патал шегьердиз. 
Къириц1вияр кк1изва 
Чпиз хас тир тегьерда. 

Хьелер къвана душмандал 
Цавай куьлуь харар хьиз. 
Къирмиш хьана душманар 
Ц1ай акатай тарар хьиз. 

Шарвилиди гьужумна 
Душманрин лап ч1ехидал. 
Шарвилиди гьужумна 
Вагьшийрикай вагьшидал. 

Садра румар гайила, 
Агъзурдан чан акъатна. 
Садра зарба ягъайла, 
Агъзурдан рик1 аватна. 

Мез акъудна шалам хьиз, 
Минетарна душманди: 
- За авунвай гъалат1дал 
Хьанва къе зун пашманди. 

Акъвазара ягъунар, 
Рекьимир чун т1вет1ер хьиз. 
Рази я чун гьамиша 
Хьун рак1арал нуькер хьиз! 

- Квахь чи гьалал чилелай! –  
Лагьана Шарвилиди. 
Гаф шехьзавай душмандин 
Ат1ана Шарвилиди. 

Ч1ехи кьушун элкъвена, 
Гъалиб хьана душмандал. 
Ч1ехи кьушун хтана, 
Хъуьрез-хъуьрез пашмандал. 

Шарвилиди ахъайна 
Шегьеррай кат хьайибур. 
Шарвилиди ахъайна 
Вичиз куьмек гайибур. 

Акахьна ам инсанрин 
Зурба селдик зегьметдин. 
Кьадар вуч хьуй, Шарвили, 
Ваз ийизвай гьуьрметдин?!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.