Перейти к основному содержанию

Кьуд лагьай мах

ШАРВИЛИДИН АХВАР 

Шарвилидин нефесди 
Зурзурзавай к1валин къав. 
Адаз ахвар аквазва: 
Къацу чилни вили цав. 

А кьил таквар гегьенш чуьл, 
Ядни алач мукьварал. 
Мурз къугъвазвай ракъинин 
Канвай яру накьварал. 

Чуьл гегьенш тир, баябан, 
Бени инсан авачиз. 
Чуьл гегьенш тир, баябан, 
Ничхир, гьайван авачиз. 

Касс авачир и чуьлда 
Акъвазнавай Шарвили. 
Белки, хайи халкьари 
Яргъазнавай Шарвили? 

Ялгъузвилин гъамар мад 
Рик1е гьатна жегьилдин. 
Бахт санихъ, рик1 масанихъ 
Рекье гьатна жегьилдин. 

Ирид йикъан мензил къе 
Шарвилиди ат1ана. 
Акъатай хьиз агъадкай, 
Рагъ хъфена ак1ана. 

Адан япув манид ван 
Яваш-яваш агатна. 
Къудгъун хьана Шарвили 
Къалабулух акатна. 

Шарвилидиз садрани 
Акурди туш аламат, 
Ам ничхиррин гъиляйни 
Акъатайд я саламат. 

Лугьуз жедай кас авач 
Вичин вилиз такурди. 
Аламат я, аламат  
Шарвилидиз акурди. 

Адан вилик къвазнавай 
Гьуьруь хьтин гуьзел руш. 
Адан вилик къвазнавай 
Пери хьтин гуьзел руш. 

Адан кьилел таж алай 
Цуькверикай гатфарин. 
Акур касди лугьудай: 
- Гуьзелвилиз аферин! 

Генг перемдик ипекдин 
Йифен хъуьтуьл гар галай, 
Эрч1и къуьнуьхъ ая авай 
Къизилдикай квар галай. 

Шив алай са къерехдал, 
Кек ягъиз, чил зурзуриз. 
Шив алай са къерехдал, 
Хуррамвиляй гьиргьириз. 

Руша яргъи авуна 
Шарвилидихъ вичин гъил. 
- Хура твамир, - лагьана, -  
Кьегьал, на гьич жуван кьил. 

Ша, хъухъ вуна кварцевай 
За вун патал гъайи яд. 
Ви гьарарат яваш хьуй, 
Хъухъ тухдалди къайи яд. 

Ахпа тадиз хкаж хьухь 
Лацу шиврен далудал. 
Гъил эцига атана 
Зи пелел, зи хурудал. 

Хьайит1а ваз бегенмиш 
Зи иервал, манияр, 
Хьурай вун зи адахли, 
Хьурай вун зи к1ани яр. 

Ирид стха ава захъ, 
Зун абурун вах я тек. 
Тади ая, фикирмир, 
Йиф катзава, жезва экв… 

Баябандин са патай 
Ракъинин нур авахьна. 
Юзадалди Шарвили, 
Руш нурарик акахьна. 

Галтугнат1ан гуьгъуьнай, 
Руш виликай къакъатна. 
Ирид йикъан ахварай 
Шарвили ик1 аватна. 

Килигна ам цлариз 
Вичин кесиб дехмедин. 
- За а гуьзел жагъурда! –  
Шарвилиди кьуна кьин. 

Эгер йикье гьахьайт1а, 
Киф ат1ана экъеч1а. 
Рекьяй, югъ бес тахьайт1а, 
Йиф ат1ана экъеч1а. 

Буьгьтендикай хкудиз 
Алакьдайди игит я. 
Буьгьтен туна, мураддив 
Агакьдайди игит я. 

Акур руша ахварай 
Ц1урурзавай Шарвили. 
Яр сана, вич масана –  
Кьурурзавай Шарвили. 

Экуьн кьиляй къарагъна, 
Чиг аламаз векьерал, 
Экъеч1на ам хуьруьвай 
Яргъаз физвай рекьерал. 

Гьатна рекье Шарвили, 
Физва сифте сефердиз. 
Кьибледихъ ваъ, терсина 
Физва кьегьал кефердихъ. 

Фена жегьил дерейрай, 
Мензил ат1уз, рехъ ат1уз. 
Фена жегьил дуьзенрай, 
Буьркуь ат1уз, мекь ат1уз. 

Рик1е ашкъи гьатай кас 
Галатдани рекьера? 
Рик1е ашкъи гьатай кас 
Алатдани рекьелай? 

Шарвилидин рик1ени 
Ч1ехи ашкъи гьатнава. 
Ватан патал, яр патал 
Чан эцигун кьет1нава. 

Хабар хьанач садазни 
Шарвилидин рекьикай. 
Хабар хьанач садазни 
Шарвилидин рик1икай. 

Хуьре, к1вале гьатна ван 
Квахьна лугьуз Шарвили. 
Фена ирид чилериз 
Гьахьна лугьуз Шарвили. 

Хуьруьнвийри кьуна яс, 
Амач лугьуз Шарвили. 
Агьузарна дустари, 
Хьанач лугьуз Шарвили. 

Ирид йикъан мензилдиз 
Фена жегьил, галатнач. 
Ирид йикъан мензилда 
Ам рекьелай алатнач. 

Чара хьанвай чкадал 
Ирид рекьин хилел са, 
Хкаж хьанвай аршуниз 
Ирид гьава к1валер са. 

Агалнавай варарни, 
Дак1арра экв авачир. 
Имаратдин патарив 
Бени инсан гьич гвачир. 

Шарвилиди фикирна 
Мертебайриз килигна: 
«Гьикьван къвазда къах хьана?» 
Ада камар виликна. 

И вахтунда дак1ар са 
Ахъа хьана легьзеда. 
Анай атай нурари 
Рагъ къалурна вядеда. 

Гьа и ч1авуз дак1ардай 
Милаим ван акъатна: 
- Заз чизва, вун Шарвили 
Зи к1валерив агатна. 

Эгер ят1а багьа ваз 
Ви к1анивал чандилай, 
Зи стхайрин кьисасар 
Вахчу Аждагьандилай. 

Абур инлай ирид къан 
Са мензилда авазва. 
Душман гужлу ят1ани, 
Кьегьалри кар аквазва. 

Ирид сефер югъ хьана, 
Ирид сефер хьана йиф. 
Ирид сефер Марф къвана, 
Ирид сефер гьатна циф. 

Са пакамахъ жегьилдиз 
Цав агаж жез акуна, 
Вилик квай са дередай 
Руг хкаж жез акуна. 

Шарвилидиз инал са 
Инсан къекъвез акуна. 
Адаз ирид гъил авай 
Аждагьан къвез акуна. 

Шарвилиди вичин тур 
Тадиз гъилик авуна. 
Кьве лув кьуна душмандин, 
Къекъуьрна тур руфуна. 

Цававай руг ацукьна, 
Ахъа хьана гьавани. 
Аждагьан ярх хьайила, 
Секин хьана дявени. 

Ирид стха са пата –  
Ивид къене сузадик. 
Майданд юкьвал – Шарвили, 
Ирид стха – къузадик. 

Ирид гъил квай Аждагьан 
Ивид къене зурзазвай. 
Стхайрини гьар сада 
Муькуьдавай жузазвай: 

- Им вуж кас я, вуж я ам 
Чи куьмекдиз атанвай, 
Аждагьандин ирид гъил 
Садра яна ат1анвай?! 

Гъвеч1и стха атана 
Шарвилидив агатна: 
- Вун вуж ят1а лагь кван чаз, 
Иниз гьинай акъатна? 

Шарвилиди гъилерал 
Кьуна гада аял хьиз, 
Ирид касдив эгеч1на 
Ирид йикъан хиял хьиз: 

- Зун лезгийрин хзанда 
Хайи халис лезги я. 
Шарвили я зи т1варни, 
Рик1 са т1имил векъи я. 

Ч1ехи стха къарагъна 
Дагъдин пад хьиз чилелай, 
Къац1анвай кап алтадна 
Шарвилидин къуьнелай: 

- Ви намусни къучагъвал 
Акуна чи вилериз. 
Къуй вун стха хьурай чаз, 
Хъфин чун чи к1валериз. 

Гьана чна ацукьна 
Ихтилатар ийида. 
Ихтиярни гвазва вав, 
К1ан хьайила, хъфидай. 

Рази хьана стхаяр, 
Рази хьана Шарвили. 
Рекье гьатна к1валерихъ, 
Т1арвал тагуз т1арвили. 

Гъвеч1и стха экъеч1на 
Сифте к1валин гурарай. 
Гегьенш айван хъуьрена, 
Гьатна ракъин нурара. 

Ваха тадиз ахъайна 
Сандух михьи къизилдин. 
Суфрад винел дуьзмишна 
Дава-дарман несилдин. 

Хирер михьиз чуьхвейла, 
Стхайрин т1ал ат1ана. 
Шарвилидин рик1е руш 
Къизилгуьл хьиз ак1ана. 

Ч1ехи стхад теклифна: 
- Вах хьурай Шарвилидиз, 
Кьил амай кьван уьмуьрда, 
Рагъ хьурай Шарвилидиз! 

Шарвилиди вичин кьил 
Хура туна регъуь яз. 
Хъверна вири стхайри 
И теклифдал рази яз. 

Шарвилидин хиялда 
Кьакьан дагълар къекъвена. 
Хайи к1вал, хуьр, къуншияр, 
Рагар, вац1ар къекъвена. 

Шарвилиди рик1ин къаст 
Вичин ярдиз лагьана. 
Ахпа фена икрамна, 
Схтайриз дуьз лагьана. 

Рази хьана стхаяр 
Шарвилидин гафунал. 
Жегьил свасни рази я 
Санал кьведни хъфинал. 

Гьазурвилер акуна, 
Рекье гьатна Шарвили. 
Вичин к1ани свас галаз 
К1венк1ве гьатна Шарвили. 

Рекье гьатна Шарвили 
К1ани Ватан галайнихъ. 
Рекье гьатна Шарвили 
Диде-буба авайнихъ.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.