Халидин Эльдаров

Халидин Эльдаров Ахцегь райондин Къурукаларин хуьре 1974-йисан 6-мартдиз дидедиз хьана.
1989-йисуз хайи хуьруьн а чIаван муьжуьд йисан мектеб куьтягьай ада 1993-йисуз Магьачкъаладин музыкадин училище, 1998-йисуз Дагъустандин гьукуматдин университет, 2002-йисуз Магьачкъаладин промышленно-экономический колледж ва 2005-йисуз Дагъустандин гьукуматдин технический университет агалкьунралди куьтягьна.
1998 – 2001-йисара Россиядин илимрин академиядин Дагъустандин илимдин центрадин чIалан, литературадин ва искусстводин институтдин аспирантурада кIелна ва 2005-йисуз филологиядин илимрин кандидатвилин дережа къачуна.
2001 – 2014-йисара республикадин са шумуд вузда муаллимвиле, доцент яз ва кафедрадин заведующийдин къуллугъдал кIвалахна. Алай вахтунда алимди Магьачкъаладин гуманитарно-педагогвилин колледжда муаллим, республикадин меркездин 56-нумрадин многопрофильный гимназияда директордин заместитель яз кIвалахзава.
Халидин Эльдаров 2000-йисуз Дагъустандин жегьил писателрин совещанидин иштиракчи хьана. Адан шииратдин эсерар газетриз, журналриз акъатзава, «Жегьил Дагъустан» тIвар алай уртах кIватIалдик ва «Лезги шииратдин жавагьиррин хазинадай» антологиядик акатнава. Заридин эсерар урус чIалаз элкъуьрнава.
Адан къелемдикай лезги литературадиз талукь тир цIудралди илимдин макъалаяр ва «Алай девирдин лезги шииратда лирикадин жанрияр» (Магьачкъала: «Лотос», 2014) монография хкатнава.
Бажарагълу шаир, республикада сейли критик ва публицист, филологиядин илимрин кандидат Халидин Эльдаров 2014-йисалай Россиядин писателрин Союздин ва 2015-йисалай Россиядин журналистрин Союздин член я. Адаз «Дагъустан республикадин образованидин отличник» хурудал алкIурдай знак ганва.
Зариди Магьачкъала шегьерда уьмуьр тухузва.

Чешмеяр:
Акимов Къ. Х. Лезги зарияр. – Магьачкъала: «Мавел», 2015.
«Лезги газет». – 2017-йисан 31- август.