Руьгьдиз икир ая Инсан!

Кӏватӏмир кьилиз буш хиялар,
Дагъдин кьилел цифер хьтин.
Кӏватӏа кьилиз хуш хиялар,
Ислягьвал гвай лифер хьтин.
Икрагь тахьуй тандикай чан,
Руьгьдиз икир ая инсан!

Цlай авачиз гум акъудмир,
Пис крарив гъил агудмир,
Чарадан фу на къакъудмир,
Виждан чилел гьич авудмир,
Вилин экв хьиз хуьх ам жуван,
Руьгьдиз икир ая инсан!

Буьркьуь тахьуй гьахъ гвай вилер,
Идаз-адаз мийир шелер,
Твамир чанда нагьахъ хъилер,
Тур на чилел хъсан гелер,
Жив цӏурурмир кьакьан суван,
Руьгьдиз икир ая инсан!