Виликан вахтара бязи колхозар ва совхозар куьнуьчивелни машгъул жезвай. Акьван зегьмет алачир и кIвалахди хуьруьн жемятдиз хийир гъизвай. Вучиз лагьайтIа, хьайи виртIедикай хуьруьн жемятдивай ужуз къиметдай маса къачуз жезвай. Са йисуз вирт акъуддай чIавуз а куьнуьяр авай бригададин фялейризни нисинихъ тIуьн патал са кур вирт гъанай. Фялеяр, адакай са тIимил нез, къерех хьанай. Амма Эмруллагь сакIани тух жезвачир. Нагьахъ лагьанвайди туш: «Етимдин руфун ацIайтIани, вил ацIудач». А куруна авай вирт вири тIуьна куьтягьдалди, ада гъил къачуначир.
Са арадилай адан япара чIижерин «зуз…зуз…зуздин» ванер гьатиз гатIунна. Адан туьтерай кьур акъатна, ада, «яд, яд» лугьуз, гьарайиз эгечIна. Фялейри адаз са гичиндавай яд гана. ЯтIани, адан къарихвал кьенач. Кар икI яз акурла, фялейри, гичинралди, ведрейралди ятар гъиз, адан кьилелай илична. Амма Эмруллагьан цIай ци туьхуьрзавачир. «Кузва, кузва, я жемятар, зун кузва!» лугьуз, ада инихъ-анихъ звериз гатIунна. И кардикайни фагъирдиз куьмек хьанач. Ам кьакьан къавахдин тарциз акьахна, белки, са куьмек жеда лагьана фикирна. Амма гьанани адавай давам гуз хьанач. Тадиз чилел эхвичIна, вичин кьилелай яд иличун давамарна. Кесибдиз гьава бес жезвачир.
Эхир хьи, пуд сятдилай виниз, цIай акатнавайди хьиз, инихъ-анихъ чукуриз, къавахдин тарциз акьахиз, эвичIайдалай, ведрейралди ятар иличайдалай кьулухъ Эмруллагьан ялав туьхвена, адан япара авай «зуздин» ван атIана, ам секин хъхьана. И пуд сятдин вахтунда Эмруллагьан вилерай дидеди гайи нек хтанай.
Гьа йикъалай гзаф тIуьнал рикI алай, темягькар инсанриз хуьруьнвийри лугьуз хьана: килиг гьа, вирт тIуьр Эмруллагьан йикъа гьатда вун!
Азиз Мирзебегов
Добавить комментарий