Перейти к основному содержанию

Сад за лугьун, сад вуна лагь

Шуьшедавай ви шикил за,
Руг ацукьиз тадани, яр.
И вад йикъан дуьньяда, лагь,
За ви гевил хадани, яр.
 
Сад за лугьун, сад вуна лагь,
Кай Кереман бендерикай.
Ахпа за ваз ихтилатда,
Зи чандавай дердерикай.
 
Инсаф атуй, яр, ви рикIиз,
Зун кайи цIу вун кудайвал.
Имид рикIел Аллагь атуй,
Зун масадаз тагудайвал.
 
Эслид сурун кьилик галай
Хел хуравай хурмадин тар.
Эсли кайи чкадал ша,
Лацу нафтIад шуьше гвай яр.
 
Эсли, Керем хьайид ялда
Кьвед са къизил ичиникай.
Я сад Аллагь, чазни кIанда
Виридаз гай бахтуникай. 
 
За пенжердай ич вегьида,
Яраб вавай кьаз жедатIа?
Зи рикI алай кIани къелем,
Вун эхирдай низ жедатIа?
 
Зун кIан хьайи гададиз мад
Закай гафар тавурай лагь.
Жуван буйдин яр кьунва за,
Вичин къайгъу авурай лагь.
 
Имид багъдай нуьгед ичер
Тахьанамаз гьикI атIуда?
Яр, вун яргъай акур чIавуз
Зи къеневай рикI атIуда.
 
Чинард тара ципицIар мад
Чубарукри нез физава.
АтIай гаф лагь, рикI алай яр,
Чи уьмуьрар къвез физава.
 
Чи дагълариз кьуьд татанмаз
Чал къвазавай живедин хар.
Чубарук хьиз чалагардай
Къелеман кар гьикIда вахар.
 
Гардандавай кагьрабаяр
Захтияр я, захтияр я.
Заз чидайбур за лагьана,
Гила, яр, ви ихтияр я.
 
Вун винидай агъадихъ ша,
Дидедин хва, са зербина.
Дердерикай цIай акатна,
Куда диде ви дердина.
 
За пенжерда цуьквер цада,
Иервилер хьуй лагьана.
За балайриз чан-рикI ида,
Кьуьзуь хьайла хуьй лагьана.
 
Чубан ярдин цIуру чанта,
Таза ниси бул я гада.
Хеб дагъларай хкведалди
Мехъерардай зул я гада.
 
Кьериз-кьериз аквадай рагъ,
Чаз Аллагьди гай рузу я
Гагь сувара, гагь талада,
Чун чи хуьруьк тамарзу я.
 
Ахцегь пата цав рахада,
Яраб ана жив къвазва жал?
Яр захъ галаз геж рахада,
Чаравилин къай къвезва жал?
 
Ша, на икьван захавалмир,
Я гада, вун кесиб жеда.
Аяр рушар суракьмир на,
Ваз хендеда несиб жеда.
 

КIватIайди: Саимат Аббасова,
КцIар райондин Хьилерин хуьр
САМУР газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.