… КЪАРИБ

Тум галай гъед физвай хьтин
Ви пудкъад йис фена, Къариб.
Вилериз вуч акуна ви,
Япариз вуч гьена*, Къариб?

“Чан!” гаф-пай я рикIин кIусдин,
Хийир ава гьар муркIуцIдин.
Ваз хатурар идай касдин
Вуна хатур хвена, Къариб!

Мад чида ваз тIимил-пара,
Вун кьуьзуь лекь чи сувара.
Гуж аватIа къваз-луварра
Пехъерилай вине, Къариб!

Цавай мукьвал къведа гъетер,
Гъетерилай яргъа къветер.
Хтулар бубадин нетер,
Аялдиз элкъвена, Къариб!..

Ви хиялра са ттар ава,
Цуьк ахъаюр гатфар ава.
Ви гуьгьуьлдиз дакIар ава
Чи яйлахрин къене, Къариб!

Уьмуьр лугьурд яргъи рехъ я,
Дуьня бахтар регъвей рвех я.
Чилер чIвех* я, цава тIекв я-
РикI авай кас кана, Къариб!

Фад чим къачурд фад рекьида,
Экв гвайда чаз рехъ ийида.
Ни жузуртIа мус рекьида?-
Къалп дустари кьена Къариб!
*чIвех- цан цанвай

ВАРЗ АЛАХЬАЙ ЙИФЕРИЗ
Гила туьмер ни гузва
Ви а яргъи кифериз?
Вун зи рикIел хквезва,
Варз алаxьай йифериз.

Хатрутдин кIан чка тир,
Ксанамаз кьван къушар.
Шагьвар акьур пешери,
Ийидай чаз кушкушар.

Ви киферихъ галукьна,
Вацран эквер кьатI хьанай.
Цавай атай иервал,
Са ви чиниз кIватI хьанай.

Чун пел-пеле акьурла,
Варз пешерик кIев жедай.
ЧIулав вилер, бес за ви
А мичIина*, гьикI недай?

Гила туьмер ни гузва
Ви а яргъи кифериз?
Зун ви рикIел хквезван…
Варз алахьай йифериз?

*МичIина-мичIи чкада

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.