Хъел тахьурай

Гад аранда акъуд тийин,
Дагълар закай хъел тахьурай.
Зун акурла, ачухдай чин,
Дустар закай хъел тахьурай.
 
Ирид чешме булах ргай,
Вилик къацу яйлах галай,
Кьакьанвилел дамахзавай
Рагар закай хъел тахьурай.
 
Гьар рангунин цуькверин ни,
ЖикIи, чумал, кицик, ини,
Дигмиш хьанвай чIулав  пIини,
Багълар закай хъел тахьурай.
 
Хурал кьуна мелгьемдин ник,
Векьин маркар жергеда тик.
Битмишнавай бандурагъ, цик
Зи «Лар» закай хъел тахьурай.
 
Кьакьанрилай хкадриз, гур
Шуршурдин ван тамара тур,
Шагьнабат, КIур, Кьудял, Самур
ВацIар закай хъел тахьурай.
 
Гад аранда акъуд тийин,
Хъфин дагъдихъ элкъуьрна чин.
Дамахар гвай лезги чилин
Картар закай хъел тахьурай.

Бандурагъ, цик - кузвай хъчар
Лар - дагъдин яйлах