Алай йисуз лезги эдебиятдин Къуба патан векилрикай сад тир Кесиб Абдуллагь (Абдуллагь Саруханов) дидедиз хьунин 145 йис тамам жезва. вичиз «Кесиб» тахаллус хкягъай, кесиб къатарин даях тир, женгчи шаир Абдуллагь 1875-йисуз виликан Къуба уезддин Манкъулидхуьре лежбердин хизанда дуьнядиз атана.
Чеб таяр-туьшер тир аданни чIехи СтIал Сулейманан жегьил йисарин кьисметра сад-садаз ухшарвилер пара ава. Кьведни фад етим амукьна, кьведани яргъал йисара дуьнядилай цIар ягъана «бахтунихъ экъвена», батраквални авуна, лежбервални, фялевални. Анжах вичихъ хци зигьин авай Абдуллагьа гъвечIи чIавуз кIелиз-кхьиз чирна.
Абдуллагьаз бахт жагъаначтIани, уьмуьрдин зурба тежриба кIватIна, заманадин нагьахъвилериз акси вичин ван хкажна. Ам жаван берейрилий аямдин дерди-беладикай шиирар туькIуьруьз гатIунна. Шаирдин «Приставдин бармак», «Туьрез», «Зулун марф», «Дуьняда», «Экуь дуьня» ва маса эсеррай аквазвайвал, ада зегьметчи халкьдин векил хьиз майдандиз экъечIна вичи уьмуьрзавай гьахъ-дуван авачир девирдиз лянетзава. вири кесибри хьиз Абдуллагьани советрин власт рикIин сидкьидай кьабулна. Ада вичин шиирар синфи душмандиз аксина элкъуьрна. Белки гьа и кардини адан уьмуьрдал эхир эцигна.
Абдуллагь кьейитIа мукьвал йикъара,
Вири лезгийрихъ хабар агакьара... - кхьей шаир хъеле гьатнавай кулакрин тапшуругъдалди 1934-йисуз инсафсузвилелди яна кьена.
Кесиб Абдуллагьан (адаз хуьре Буьркьуь Абдуллагьни лугьудай) шиирар сифте чи ч?ехи шаир Забит ризванова к?ват? хъувуна. Адан эсеррикай литературавед алимар тир Гьажи Гашарова, Къурбан Гьакимова, регьимхан Клебеханова, Сейфеддин Бедирханова ва масбуру илимдин макъалаяр кхьенва.
Кесиб Абдуллагь Къуба патан лезги эдебиятда Нуьреддин Шерифовахъ, Эмираслан Гъанидихъ, Эмираслан Аслановахъ галаз са жергеда акъвазнавай классикрикай сад я. Адан эсерар тарсунин ктабрик акатнава, мектебра чирзава.
"КцIар" газет
Добавить комментарий