Къубадин баядар

Къубадавай ичин багълар
Цуьк акъудна лацу ялда.
Вун хквезвач лугьуз гада,
РикIи завди гьикьван къалда?
 
Кьудял вацIал кьул вегьена,
Кьуд патахъди яд алахьиз.
За ваз мад чар кхьизва яр,
Кьве вилелай нагъв алахьиз.
 
Я Къубадиз физвай къелем,
ЭвичIа тIун балкIандилай.
Мус хкведа лугьуз рекьер
Гьикьван хуьда айвандилай.
 
Чаз Къубадай са мукIратI гъваш,
Назназидин пIипI атIудай.
Са кьве мани лугьуда за, 
Ви къеневай рикI атIудай.
 
Къуба авай Кьудял дере
Алахьна физ ятар ялда.
Чун кIевера акIун вахар,
Аллагьд тагай бахтар ялда.
 
Къубад рекьер сал я вахар,
Жерг ягъана физ тахьурай.
Гъурбатда хьун тIал я вахар,
Гъурбат рикIел гъиз тахьурай.
 
Заз Къубадай диба гъимир,
Зардин пекер ава захъ яр.
АлакьдатIа фад хъша вун,
КIанидан вил гала вахъ яр.
 
Къубад багъдин юкьвал алай,
Юкьвал алай къизилдин гуьл.
Яраб бахтар ни пайнатIа,
Садаз пара, садаз тIимил?!
 
Цавай физвай вад вили лиф,
Яраб абур вахар я жал?
Къубадавай кIани ярдиз
Зи рикIикай хабар я жал?
 
Ви чIалари кана зи рикI,
Къубадавай ашукь гада.
Икьван зарул мани лугьуз,
Яраб вун нел ашукь ятIа?
 
Къубад багълар цуькведава,
Цуькведава лацу хьана.
Я бахтавар кIани къелем,
Зун ви буйдал алцур хьана.
 
Шагь дагъдилай къарагъай гар,
Вучиз икьван серинда вун?
Чан Къубада авай зи яр, 
Виридалай ширинда вун.
 
Заз Къубадай диба гъимир,
Гуз алахъмир вири алем.
Саламатдиз хъша хуьруьз,
Заз ви паяр кIандач къелем.
 
На лацу шив чукваз тахьуй,
Къубад пелер тик я гада.
КIани ярдин сифте ашкъи
Гуьз тежедай ник я гада.

Менсуре САЛМАНЗАДЕ,
Къуба райондин Дигагь хуьрьун юкьван мектебдин муаллим
САМУР газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.