Ноябрдин 2-аз Кц1ар шегьердин кьилин улубрин к1валин ч1ехи залда, «Шагьдагъ» ва «Марвар» литератур к1ваталри туьк1уьрай Дагъустандин халкьдин шаир Байрам Салимован 90-йисан юбилейдиз талукьарнавай юбилейдин мярекат кьиле фена. Мярекат зари Вакъиф Муьшкуьрвиди юбилярдин уьмуьрдин рекьикайни туьк1уьрунрикай авур докладдалди авална. Мярекатдиз Магьачкъаладай атанвай юбилярдин уьмуьрдин юлдай Написатани руш Эсмера, Къубадай, Яламадай, Худатай атанвай вахарин ва стхайрин аялрини хтулри са чимивални миливал гъана. Мярекатдал зарияр Лезги Багьлула, Билал Адилова, Адил Къайибханова, Гуьлалийрин Эйваза, экуь инсанар Багьрам Залова, Абир Тагьирова,Шихжамал Шихметова, Оруж Оружова, Жавид Тагьирова, Роберт Къайитмазова, «Самур» Лезги Милли Медени Меркездин идаре гьеййетдик квай физикадин илимрай философиядин доктор Дуьнямеддин Аскерова ва гьак1ни лезги ч1алан тарсун улубрин эксперт педагогикадин илимрай философиядин доктор Гьесанбала Мамедова чпин рик1ин гафар ва юбилярдихъ галаз галк1ай ихтилатарна. Мярекатдиз Чубукьлу хуьруьн мектебдин директор, юбилярдин хуьрунви Къунагъ малим вичин шак1уртарни галаз атанвай. Вад лагьай синифдин шак1урт Къардашова Фарида Фазилан руша шаирдин «Дири къванер», ирид лагьай синифдин шак1уртар Къардашов Къиямеддин Фазилан хци ва Алимирзева Зегьра Бегьрузан руша «Зи чил» ва «Зи хуьр» шиирар хуралай лагьана. Мярекатдиз Кц1арин Девлетдин Лезги Драм Театрдин актерар Замир Бабаев заридин «Зи хайи к1вал», Иса Мусаев «Кисмет», Рантик Успатов «Ая на инсаф» шиирар гваз атанвай. Пуд сятуна кьиле фейи мярекат оператор Ст1урви Адила лентиниз къачуна. Шикилар ягъайдини студент т1игьиржалви Камран, мярекат кьиле тухвайдини Къурбаналийрин Камран тир.
«Алам»
Добавить комментарий