Перейти к основному содержанию

Хайи чIал чи дамах я

лезги диктант

Виридуьнядин лезгийри, гьакIни кцIарвийри хайи чIалал диктант кхьена.

ЦIинин йисалай октябрдин 10 лезги чIалан сувар яз къейдзава. Сифте суварин юкъуз кьиле фейи лап зурба мярекат ругуд уьлкведин къадалай виниз шегьерра уьмуьрзавай агъзурралди чи ватанэгьлиди иштирак авур умуми диктант хьана.

Суварин и важиб мярекатар Дагъустандин халкьдин шаир СтIал Сулейманан 150 йисан юбилейдиз талукьарнавайвиляй диктантдин текст патални шаирди вичин уьмуьрдикай рахазвай “Жувакай ихтилат” эсердин са чIук хкянавай.

КцIарвийри диктант виликдамаз махсуси тешкилнавай маканда-КцIарин Кьилин Ктабханадин залда кхьена.
Адан тешкилатчи шаир-кхьираг Вакъиф Гьажиагъаев (Муьшкуьрви), координатор педагогикадин илимрин кандидат, Азербайжандин Муаллимрин Институтдин кьилин муаллим Гьасанбала Мамедов тир. Мярекат вини дережада кьиле финиз ктабханадин директор Загьир Мустафаева мукьувай куьмекар гана.

Имтигьандиз атанвай чара-чара яшарин инсанар, кеспийрин иесияр тир къанницIусад касдин вилик рахай тешкилатчиди Виридуьнядин лезгийрин умуми диктантдиз талукь мярекатдин кьилин макьсад халкьдин арада хайи чIал, меденият теблигъун, лезги чIалал кхьинин рекьяй савад хкажун, жемиятдин ва гьукуматдин идарайрин фикир хайи чIалан месэлайрал желбун тирди къейдна.

Ахпа Гьасанбала муаллимди диктантдин текст кIелна. Гуьгъуьналлаз ам секиндаказ дикте авуна.
Дидед чIалай чпин чирвилерин дережа синагъунихъ эгечIайбуру 45 декьикьада 173 гафуникай ибарат диктант кхьена чарар координатордив вахкана.

Кьве йикъалай виридаз талукь умуми диктантдин нетижаяр баянарна. Гьар са иштиракчидиз вичин хсуси нумрадиз килигна къимет чирдай мумкинвал хьана.

Кцlар газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.