Вакъиф Муьшкуьрвидин гьуьрметдай

Вакъиф Муьшкуьрви

2019-йисан 5-октябрдиз, «Марвар» ва «Шагьдагъ» кIваталри КцIар шегьердин улубрин кIвалин чIехи залда муаллимрин йикъазни зари Вакъиф Муьшкуьрвидин туькIуьрунриз талукьарнавай мярекат кьиле тухвана. Идакай «Алам» журналдин редактор Къурбаналийрин Камрана «Фейсбук»-да хабар гана.

Мярекат сифте гафуналди «КцIар» газетдин кьилин редактор, машгьур журналист Видади Севзиханова ахъайна. Гуьлалийрин Эйваза заридин поэзиядикай, Шихжамал муаллимди уьмуьрдин рекьикай, Римма Гьажимурадовади прозадикай, Абир муаллимди этнографиядин эсеррикай, философиядин илимрин доктор Гьесенбала Мамедова зариди туькIуьрнавай тарсунин улубрикай докладар авуна.

Гуьгъуьнай рахай зарияр Лезги Бегьлула, Зерифа Кьасумовади, Терана Оружева-Керимовади, Билал Адилова, Гуьнеш Мевланова, Мегьбуба Агъаевади, Бести Нифтиевади Вакъиф Муьшкуьрвидин эсеррикай чпин фикирар лагьана, шиирарни кIелна.

Чпин рикIин гафар Къубадай ва Хачмаздай атанвай зарияр Пирали ва Бейуькагъа муаллимрини лагьана.

Манкъулидин хуьруьн мектебдин аялри ва заридин хтул Тамам балади кIелай шиирри мярекатдиз са милливал гъана. Манкъулидин хуьруьн культурадин кIвалин директор Элвин Магьемадгьуьсейнова Вакъиф Муьшкуьрвидин чIалариз чи чIехи композитор Мегьамед Гьуьсейнова къад йис идалай вилик кхьенвай са манидал чан гъана. Манидар Роза Гьажимурадовади халкьдин манийрикай туькIуьрнавай попурийралди чи рикIер шадарна.

Мярекатда заридин хуьруьнвиярни авай: физикадинни математикадин илимрин доктор Бенямеддин Давудов, «Мел» ансамблдин регьбер Хузамеддин Пашаев, карчи Оруж Оружев, Максим Мегьсимов, Къазахстанда авай лезгийрин «Самур» макандин векил Юзев Агьмедханов, Худат шегьердай атанвай Багьрам Заловни Жемшуд Айдемиров, КцIарай — Жавид Тагьировни Жавид Агьмедов ва масабур.

Пуд сятинилайни яргъал кьиле фейи мярекат оператор СтIурви Адила лентиниз къачуна.

Лезги газет

Рубрика