СтIал Сулейманан афоризмаяр

СтIал Сулейманан афоризмаяр

Лезги халкьдин зурба шаир, вичи Дагъустанни Къафкъаз вири дуьньядиз чирай, Максим Горький-ди вичиз ХХ виш йисарин Гомер тIвар гайи СтIал Сулейманан 150 йисан юбилей кьиле фейи йикъара адан яратмишунрал рикI алай ксари Кьасумхуьрел шаирдин камаллу гафарикай туькIуьрнавай «СтIал Сулейманан афоризмаяр» тIвар ганвай ктабни чапдай акъудна. Ктабда гьатнавай афоризмаяр гьа Сулеймана вичи кхьейвал, «гьар гафуниз вичин ери аваз лагьайбур я вири».

Ктабда ганвай гзаф афоризмаяр алатай асирдин 20-йисара чи тIвар-ван авай алим, фолософ, шаир ва камалэгьли Алкьвадар Гьасан эфен­дидин хтул Алискендер Алка­дарс­кийди СтIал Сулейманавай кхьен­вайбур я. Темирхан-Шурадин ва Бакудин реальный мектебар акьал­тIарна Петербургдин политех­нический ин­ститутда кIелай Алискендера 1920-1924-йисара Куьре округдин ин­къи­лабдин комитетдин секретарвиле ва седривиле, гуьгъуьнлай округдин ис­полкомдин сифтегьан седривиле ва маса жавабдар къуллугърал кIва­лах­най. Ада вичин вири къуватар, дерин чирвилер хайи халкь мичIивиляй экуь­вилихъ, цIийи уьмуьрдихъ акъудунин, халкь­дин савадлувилин дережа хкажу­нин кардал желбнай.

Ктабда Алискендер Алкадарскийди Су­лейманан мецелай кхьей камал­лу гафарилай гъейри, кIватIал туь­кIуь­райда шаирдин чIаларай къачур афо­ризмаяр ва насигьатарни гьатнава.

Ктаб туькIуьрайди Дагъустандин халкь­дин шаир Майрудин Бабаханов, ре­дак­тор Гьажи Ильясов я.
 

Айнур НОВРУЗБЕКОВА
САМУР газет

Рубрика