“Марварни” “Шагьдагъ” санал

Лезги Бегьлул

КцIарин Меркездин Ктабханада нубатдин поэзиядин мярекат кьиле фена.

Вичин ракIар шиират канибурун чиниз гьар чIавуз ахъа тир и културадин макандиз и гъилерда чи тIвар-ван авай шаир, муаллим Лезги Бегьлулан чIаларал рикI алайбур кIватI хьанвай.

Садни и шиирдин межлис вичихъ са шумуд йисан тежриба авай “Марвар” кIватIалдинни ктабханадин кьилив мукьвара арадал гъанвай, регьбервиле Лезги Бегьлул акъвазнавай “Шагьдагъ” эдеби кIватIалди санал тешкилнавай.
Межлисдал гаф къачуна рахай шаир, “Марвар” кIватIалдин регьбер Гуьлалийрин Эйваза Лезги Бегьлулан уьмуьрдин, туькIуьрунрин рекьикай, адан поэзиядин кьетIенвилерикай рахана:- Зиндан Муругъ хуьре дидедиз хьана юкьван чирвилерни гьана къачур Пагьливан Къарабеган хва Ибрагьимов (Лезги Бегьлул) 1977-йисуз Азербайжандин Къецепатан ЧIаларин институтдик экечIна. 1979-йисуз Четкуьнрин хуьре муаллимвал авур ам, са йисалай хайи хуьруьз хтана ва гьа чIавалай къедалди Зиндан Муругърин юкьван мектебда кIвалахзава.

1970-йисалай кьил кутуна Лезги Бегьлул тахаллусдив шиирар кхьизвай шаирдин чIалар сифте яз “КцIар”, “Самур” газетдин чинриз ва “Самур” газетдин редакцияди туькIуьрна чап авур “Акьата шегьредиз” кIватIалдиз акъатна.
2008-йисуз басмадай акъатай “Мулдин цуьк” тIвар алай сад лагьай ктабди шаирдиз мадни чIехи машгьурвал гъана.
И кIватIалда ада чара-чара йисара кхьенвай шиирар ва поэма гьатнава. Вичин шиирра хайи чил, хайи Ватан канарзавай, къени къилихрин ватанэгьлияр теснифзавай, чIуру ниятдин инсанар тербия ийиз алахъзавай шаирди гьар са касдиз халкьдин лайих авай векил хьуниз эвер гузва.

Лезги Бегьлулан поэзиядин экуьнал Бакудай, Хачмазай, Къубадай, КцIарин хуьрерай атана кIватI хьанвай мугьманри- меркездин ктабханадин директор Загьир Мустафаева, шаирар ва интеллигенциядин векилар тир Вакъиф Муьшкуьрвиди, Шихжамал Шихжамалова, Зерифа Кьасумовади, Севинж Мамедовади, Зиятхан Мурадханова, Бегьрам Залова, Абир ЭчIехвиди, Явер Шалбузова, Римма Гьажимурадовади, Камран Бабаева, Зиндан Муругъ хуьруьн мектебдин директор Судя Манчарова, “Алам” журналдин кьилин редактор Къурбаналийрин Камрана чпин рикIин гафар лагьана, шаир-муаллимдин поэзиядиз хас кьетIенвилерикай гаф кудна.

Чи рикI алай музыкадин устадар Расим Бакарова, Явер Шалбузова, Вуькъар Мамедрзаева тамамарай мани ва макьамри, Самур поселкадин юкьван мектебдай Гуьлдесте Аслановади, Камилла Саидовади, 6 нумрадин мектебдай тир Иера Мурадхановади, Полад Магьмудова, Фируза Магьмудовади, Фатима ва Мамедали Мамедалиеври фасагьатдаказ кIелай шиирри межлисдин иштиракчийрин гуьгьуьлар мадни шадарна.

Мярекатдал гаф къачур шаирди вичин туькуьрунриз талукьарна ихьтин мярекат арадал гъанвай къелемдин дустариз, шиирар хуралай лагьай келзавайбуруз, межлис вичин сигьир галай авазралди мадни гур авур музыкантриз разивал малумарна, вичин поэзия канибуруз автограф алай ктабар пайна, цIийи шиирар кIелна.

“КцIар” газет