Гатфар

Ирид, я тахьайтIа муьжуьд йис виликан кьиса я. Чи хару, гьужет гвай, лезгивилел лугьуз тежедай кьван кьару са дустуникай чIехи буба хьана. Вич рушан буба ятIани, хьанвайди сифте хтул тирди, якъин хьи, харувал, захавални фикирда кьуна езнед пата руш хтулдал тIвар эцигун гьадан хиве кутуна…

… Кьуд цIийиз акъатнавай. Сифте гатфарин мили, инсандин гуьгьуьлар ахъа ийидай са югъ тир. Цавун аршдавай ракъинин нурар айнабенддай къавумар ацукьнавай дивандал аватзавай.

-Гатфар! – лагьана, цIийи чIехи бубади кIвачел къарагъна кьачIузунарна, -Гатфар!

-Гьеле гьинва я къавум, хъуьтIуь вичи-вич къалурзамайди я,- хълагьна езнедин бубади- мекивиляй вак муьхце гьахьдай чIавар вилик кумайди я…

-Ваъ е, ваъ, Гатфар!-тикрарна рушан бубади,- хтулдин тIвар Гатфар эцигна за!

Айнабенддихъ ацукьнавайбуру таажжубдалди са-садаз килигна. Рушан яран дидедивайни эхиз хьанач:

-Гатфарни тIвар жедайди яни?-къалабулух акатна адак-Чаз чир-хчирди вуч лугьурай, пака Бакудин аялрин бахчада, мектебда адаз гьикI эверрай?…

-Я къавумар, квез вучиз икван кичIе хьана, Багьар я ман, Багьар, садрани ван хьайиди тушни?

-ГьакI лагь ман, кIвал къени хьайди,- дасмал акъудна пелен гьекь михьна, езнедин бубади, -на чи рикI авуднай хьи…

-Документ за къачуда, -лагьана рушан бубади, -анавайди зи кIеви дуст я.

Кьвед-пуд йикъалай хтулдин сифте документ-хайвилин шагьадатнаме гваз хтайла вири пагь атIана амукьна: ана гвечIи лезгидин твар Гатфар хьиз къейднавай.

…И къейдер кхьиниз разивал тагуникай вил ягъана завай жузаз хьанач:Гатфар гила я кьвед, яни пуд лагьай синифдиз физва. Мукьва-кьилийриз, къуншийриз ам гзаф канзава. Адан тIварни магьледа, мектебда эзбер хьанва: Гатфар!

Р.S. Чи жуввилин, милли талукьвилин, масадбурулай тафават авайвилин, чара хьунин атрибутрикай садни тIвар я. Вучиз ятIани икьван чIавалди дуьз- какур талгьана чара халкьарин, гьакIни чи чилер тарашай чапхунчийрин тIварар эцигнава чна аялрал. Зи мукьва-кьилийрал акьван «Ай»-див къвезвай тIварар ала хьи, абурукай са гьидан ятIани хтулдин тIвар рикIел хкирла кайванидин куьмек галачиз жезвач: Айгуьн, тирни, Айла тирни, Айтен тирни, Айнура, я тахьайтIа Айсел, Гуьнай…?

Бес Самура, Ирида, Магьи, Милей, Варзалай, Таму, ЗирикI, Чирагъ, Чиварз, Зиварз, Чиэкв, Яруш, Зируш, Цуьквер, Сувар, Ажай… вутI фирай?

Ша чун тIварарикай рахан!

Р.S. Зи тIвар рагьмет хьайи зи чIехи имиди эцигайди я лугьуда. «Видад» араб чIалал «муьгьуьббат», «канивал» я. Жуван ирид лагьай хтулдал (хизандин тIалабуналди) за ам «Видади» (им шаир Мулла Велидин тахаллус я) ваъ, «Видад» хьиз эхцигна. Чи чIалалдини мана ава жеди: Ви-дад!

Видади Севзиханов