Перейти к основному содержанию

Зи лиф

Югъ ачух жез, туьхуьз гъетер,
Цавун са пад къекъиф жеда.
Гьар пакамахъ сегьер-сегьер
Зи дакIардихъ са лиф къведа.
Зи уьмуьрдин сегьер рикIел
Къвез жеда, и къуш акурла.
Эзбер жеда, къвез зи мецел,
РикIин гафар, хуш акурла:
- Лув це, зи лиф, лув це, зи лиф,
Шалбуз дагъдин синерал на.
Адан ценев хьанвай алциф,
Са кьил чIугу вирерал на.
Агъадихъди лув це ахпа,
Зи хуьр алай ягъваралди.
Мензера ваз ахьтин зурба
Аквадач гьич ахварайни.
Къацу чIурар, багъни бустан,
Чиг булахрин ширширарни...
Тенг мармар я гьарма са къван,
Гиширар я жигъирарни...
Зи лиф, хуьре са кIвал ава,
Ичин багъдин куьлгедик квай.
Агь, зи рикIе са тIал ава, -
РикI а кIвалин бинедик ква.
А кIвале зун чIехи хьана,
Ам сифтегьан муг хьана зи.
Гъурбатда зун рехи хьана,
Пак мурадар руг хьана зи.
Ахлад, зи лиф, лагь зи кIвализ:
- Вил хьанва зи цларихъ пак;
Зи паталай пIагь це чилиз,
Зи рикIин тIал сурарихъ твах!..
Лув гана лиф къарагъзава...
Гьар юкъуз икI тикрар жезва.
Заз хайи кIвал карагзава -
Зи рикI лифрез ухшар жезва...

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.