И олимпиада кьетIен жуьрединди тир. Дидед чIалан суварин вилик кьиле фейи мярекат лезги чIалазни литературадиз талукьарнавай. Олимпиададин иштиракчияр хуьруьн мектебрин 11-синифра кIелзавайбурун арада хкянавай аялар тир.
Кьурагь райондин КIирийрин хуьре тухвай мярекатдин тешкилатчи Дагъустан Республикадин «Лезги газетдин» редакция тир. Олимпиада и кар патал гзаф зегьметар чIугур газетдин кьилин редактор Мегьамед Ибрагьимова ачухарна. Ада лагьайвал, им газетди и рекьяй тухвай сифте мярекат я.
«Редакциядихъ ихьтин олимпиадаяр гила гьар йисуз Кьиблепатан Дагъустандин чара-чара районра тухудай ният ава. Гьа идалди чаз инсанрин фикир хайи чIалан месэлайрал желб ийиз кIанзава. Садазни сир туш хьи, эхиримжи йисара жегьилар, иллаки шегьерра яшамишзавайбур лезги чIалал рахазмач. Хайи чIал чир тахьуни хайи меденият квадаруниз рехъ ахъайзава. Ихьтин олимпиадайри лагьайтIа, аялриз дидед чIал кIанарзава, абурун рикIера хайи чIалаз муьгьуьббатдин цIелхемар куькIуьрзава», – лагьана М.Ибрагьимова.
Олимпиадада иштирак авур 11 аялди тестерин суалриз жавабар гана, диктант кхьена, гьакIни «Зи рикI алай кхьираг» тема теснифна. Сад лагьай чкадиз Фатимат Рагьманова (КIирийрин хуьруьн юкьван мектеб), кьвед лагьай чкадиз Бирем Абдурагьманов (Ашар хуьр), пуд лагьай чкадиз Маина Османова (Аладаш хуьр) лайихлу хьана. Гъалибриз премияр, гьакIни «Урус чIаланни лезги чIалан гафарган» ва лезгийрин сейли къелемэгьли Муьзеффер Меликмамедован «Гьажи Давуд» ктабар пишкеш яз гана.
“САМУР” газет
Добавить комментарий