Алай вахтунда Волгоградда яшамиш жезвай кцIарви къелемэгьли Гьилал Аскерован «Битаввал» тIвар ганвай ктаб Москвада чапдай акъатнава. Шаир ва журналист, къени къилихрин, кьакьан руьгьдин инсан тир Гьилал Аскерован кьетIен хатI кIелдайбуруз ада гьеле юкьван мектебда кIелдай йисарилай малум тиртIани, вучиз ятIани ада кьилди ктаб акъудначир. Ингье эхирни вичин сад лагьай ктаб кIелдайбурун ихтиярда вугана авторди.
КIватIалда шаирди яхцIур йисалай гзаф вахтунда кхьенвай шииррин чешнеяр, гьакIни СтIал Сулейманаз талукьарнавай «ТуькIуьр тавур чIал» поэма гьатнава. Ктабдин редактор Фехреддин Оружов я.
Сифте гафуна Гь.Аскерова вич къелемдив агудай алатай девиррикайни инсанрикай икI ихтилатзава: «Чи кIвале чна нефес чIугвазвай гьавадикни кваз гьамиша лирикадин руьгь квай. Зи дидеди нянрихъ мугьманар ацIай столдихъ вичин рагьметлу дах Нуредин Шерифован чIалар фасагьатдаказ кIелдай. Чи суфрадихъ зи халу Иззет Шерифован сатирадин, гьуьрметлу зарийрикай Забит Ризванован ва Байрам Салимован, гуьгъуьнай заз устадвал авур Лезги Няметан лирикадин, прозаик ва публицист Ядуллагь Шейдаева язвай тардин ван жедай. Санал кIватI хьайила абуру хордалди манияр лугьудай… Лезги Нямета зи гъиликай кьуна, поэтикадин сирер чирдай рекьер къалурна. Са шумуд чIални новеллаяр райондин газетдин чинриз акъатайдалай кьулухъ зи рехъ тайин хьана…
Зи шиирар Азербайжандани Дагъустанда газетриз, журналриз, алманахриз акъатна. I974-йисан апрелдиз зун Бакудай Махачкъаладиз, а чIаван СССР-дин педвузрин фестивалдиз ракъурна. Гьа йикъара тIвар-ван авай шаиррикай Алирза Саидова, Шагьэмир Мурадова зи чIалариз гайи къиметди зак лувар кутуна.»
РикI акун четин я чарадан,
Жезва гъам къати зи къвердавай:
Дуьньядин дердерин арада
Гъавурда такьунин дерт ава, - лугьузвай шаирдин и ктаб адан рикIин гьарай я. Дерин гьиссер, экуь фикирар кужумнавай и ктаб кIелдайбуру хушвилелди кьабулдайдан чIалахъ я чун.
"САМУР" газет
Добавить комментарий