Перейти к основному содержанию

Майтаб бадедин баядар

Дагъларилай элкъвей рекьер 
Къуру я лагь, руг акъатиз. 
Зи дустари зун жузуртIа , 
Кузава лагь, гум акъатиз. 

Къацу багъдин юкьвал гьавиз 
Курум-курум яд алахьиз, 
Стхадин чар кIелзава за 
Кьве вилелай нагъв авахьиз. 

Зун и пата, вун а пата 
Чан и патаз текъведай яр, 
Лацу бишме гардандаваз 
Къветрен ериш къекъведай яр. 

Имид къавал куьлуь гелер 
Вун гелери незавани? 
Заз лишандин тупал тагъай 
Ваз рахадай мез авани? 

Вили цава варз аквада 
Я ацIай варз, я ацIай варз, 
АцIай вацран къаншардиз ша, 
Белки несиб жеда зун ваз. 

Лугьуз-лугьуз фидайлахъди 
Ярдин рекьер алудда за. 
Гьар мензилда вад бенд лугьуз, 
Яр Ватандив ахгудда за. 

Лагь, лугьудай ви сивиз кьий, 
Сиве къизил сас авай яр. 
Ви гъарибда вуч авайд я, 
Хуьре иер свас авай яр? 

Къацу тулан юкьвал алай 
Тек акIурай са къизилгьуьл 
Икьван кани ваз тагайтIа, 
Дуьнядикай атIуд за вил. 

Чуьнгуьр ягъиз кьил галтадиз 
Вун Кереман арха яни? 
Кани ярдиз кьисмет тахьай 
Залай ви дерт пара яни? 

Агъадикай акъатай рагъ 
Варз ахварай авудзавай 
Ирид суна лишан квай яр, 
Зун рикIелай алудзавай. 

Дагъларилай килигайла 
Цуьк ахъаяй Кабаш яйлах, 
Жуьред цуьквер гене авай 
Чан Лацарин Къайи булах. 

Вили цавар дамар-дамар, 
Чубарукдин сиве самар, 
Стхаяр фей вахар я чун 
Рехъ ахъая, къанлу дагълар. 

Заз ахварай яр акуна, 
Лацу перем яхадаваз, 
АкуртIни рахаз хьанач, 
Яд хьай кьве вил ахвараваз. 

Юкьван тупIук ктур тупIал 
Кутур тIупIал къаш авайд туш, 
Зун бубади гайи гада 
Залай артух яш авайд туш. 

Тик гуьнедал тек инид тар, 
Валай пешер гару тухуй, 
Заз тахьай чан вазни тахьуй 
Вун Самурдин вацIу тухуй! 

И пад дере, а пад дере, 
Селибурдин синел бере, 
Агъзур жуьред цуьк ахъаяй 
Чан Лацарин Гавдандере, 

Дагъдин кIане векь ягъада 
За ви маргъар таз экъведа, 
Ирид суна лишан квай яр 
За ви дердер гваз экъведа. 

Я бахтавар зулун фере, 
Гьикьван чалда къавун чIере, 
Кани ярди чун жузуртIа, 
Къвазнава лагь, вацIун кьере. 

Кьакьан дагълар мад кьакьан хьуй, 
КIаник дерин гьуьл жедайвал, 
Бубад Ватан майданар хьуй, 
Ярдин чамар къугъвадайвал. 

За дагълариз пер ягъада 
Жейран фейи жигъир чириз, 
За са рушаз чар кхьида, 
Адан рикIин хиял чириз.

Къацу багъдин юкьва гьавиз,
Курум-курум яд алахьиз.
Стхадин чар кIелзава за,
Кьве вилелай нагъв авахьиз.
 
Къацу багъдин юкьни-юкьвал,
Зар хараяр цузавай руш.
Ви дердинай сефил я зун,
ЦIай галачиз кузавай руш.
 
Зун и пата, вун и пата,
Чан и патаз текъведай яр.
Лацу бишме гардандаваз,
Дагъдин къвед хьиз къекъведай яр.
 
Цуьквед багъда таза гелер,
Акваз яр, вун шезавани?
Заз лишандин тупIал тагъай,
Ваз рахадай мез авани?
 
Вили цава варз аквада,
Я ацIай варз, я ацIай варз.
АцIай вацран экуьник ша,
Белки кьсмет жеда жал ваз.
 
Мани лугьур ви сивиз кьий,
Гьар гафунихъ мас авай яр.
Къариблухра вучзава на,
КIвале кIани свас авай яр.
 
Вили цавар дамар-дамар,
Чубарукдин сиве самар.
Стхаяр фей вахар я чун,
Рехъ ахъая, кьакьан дагълар.

Дагъларин кIукI вуч кьакьан я,
Ценеривай вацI физавай.
КIани къелем яргъараваз,
Зи рикIин кьил кьацI жезава.
 
И пад дере, а пад дере,
Силибурдин синел бере.
Агъзур жуьре цуьк акъуддай,
Чан Лацарин Гавдан дере.
 
Дагъларилай килигайла,
ХупI иер я Лацар яйлах.
Цуьк хураваз авахьзава,
Шумудни са ацIай булах.
 
На дагълара векь ягъада,
За ви маргъар таз экъведа.
Ирид йисуз лишан квай яр,
За ви дердер гваз экъведа.
 
Синидаллай лацу бишме,
Ам заз гъайи бахшандар я.
На чарадаз килигмир, яр.
Вакай элди рахшандарда.
 
Къаварилай къаваралди,
Ярдин рекьер галудна за.
Зарул-зарул бендер лугьуз,
Яр ватандив агудна за.
 
Тик гуьнедал тек инид тар,
Гатфар хьана, вун къацу хьуй.
Зун лагьана, масад гъайи,
Вун чи Самур вацIу тухуй.
 
ЭрчIи гъиле чуьнгуьр кьуна,
На ашукьвал чирзава, яр.
Фикир-хиял патараваз.
На зун вучиз ширзава, яр?


"Кцlар" газет
"САМУР" газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.