Физва йикъар, яд фидай хьиз кlамарай!
Рикl секин яз, ацукьнани кlвале вун?
Вун патал зун акъатзава хамарай,
Куьз гьатзавач лагь жейрандин геле вун?
Атайла йиф, зун пенжерда ацукьда,
Хияларда артух хьана сефилвал.
Зи рикlе вун муьгьуьббат яз амукьда,
Гьайиф-гьайиф, сархуш хьана жегьилвал!
Физва уьмуьр,хабар такьаз рикlикай,
Гуьзетнай за, гьамишанда гуьзетнай.
Къати гар яз физвай вун зи виликай,
"Геж ийимир!"-лагьана ваз минетнай.
Зи азизди, ажеб ви рикl секин я,
Зи умудар ихтибарда вири вал.
Ви рикlел зун мад татунни мумкин я,
Зи накъвар хьиз михьиди хьуй канивал.
Рубрика
Добавить комментарий