Вахъ галаз зун бахтлу я

Ацукьнавай абур къуьн-къуьне туна:
- Вуж я ваз зун? – дишегьлиди жузуна.
Фикирна хьиз, экв атана вилериз,
Вил вегьена касди фейи рекьериз.
КIанивилин гьиссер  рикIе къугъвана,
Ахпа ада вичин папаз лагьана:
- Патав гвайла вун - алатда рикIин къал,
Секин жеда  чанда гьатай гьар са тIал.
Яргъал вахтар са легьзедиз элкъведа,
На лугьуди, женнет багъда къекъведа.
Лувар кутаз  вуна цавуз акъудда,
Кьилел атай балайрикай хкудда…
Залан жедач кьуртIа капал заз дагълар…
Куьрелди: куьз герек я лагь и гафар?
Зи къилихрин чIурудини къениди
Кьабулзавай баркалла ваз, кIаниди.
Ша, ацукьин чун гьамиша къуьн-къуьне,
Уьмуьр тухун кIевиз кьуна гъил-гъиле.
Кьвед сад хьана физвай уьмуьр гьахълу я,
КIан я заз вун - вахъ галаз зун бахтлу я…