"Мел" - къениндалди давамзамай са мел

лезги мел

“Мултикултурализмдин йис” яз баянарнавай 2016-йисуз КцIар республикадин “Фолклордин Меркез” хкягънава.
Районда кьиле физвай суваррин программайра "Мел" тIвар акунни, виридаз ам Хьилерин ансамбл тирди чир жеда.
Гьар кишдин нянихъ чи мярекатрин кьилдин чка тир генерал Магьмуд Эбилован тIваруник квай майдандал гзаф коллективри чпин алакьунар къалурзава. Алатай кишдиз и майдандал "Мелдини" махсус программадив чихишна.
Директор Хуьземмед Пашаев кьиле аваз сегьнедал экъечIай ансамблдин иштиракчийрин арада яшлубур, юкьван яшаринбур, же-гьилар ва гьатта аяларни авай. Хьиливийри элдин сенятдин чешнеяр тир сар эвягъун, чхрадал гъалар авун, гам хран хьтин крар къалурна. "Мелдин" солистри тамамарай халкьдин манийрин авазри, дегь макьамрал авур кьуьлери майдан сиве-сивди ацIурнавайбур кцIарвийрин ва мугьманрин гуьгьуьлар шадарна.
Бес алай несилдиз “мел” вуч ятIа, мелер куьз, гьикIа, гьибуру кьиле тухузвайтIа чизвани?
Мел-чи халкьдихъ дегь девирдилай амай къени адетрикай сад я. Мелери халкь агудда, инсанрик руьгь кутада. Керпичар атIудайла, кIвалер эцигдайла, рекьер чIугвадайла, муь-   къвер расдайла, хиперин ис твадайла, абур эвягъдайла, гъалардайла, рушан мес-къуьж гьазурдайла, гвенар гуьдайла, гьажибугъдаяр экъитIдайла...эвердай мелер иллаки гур квай ва шадбур жедай.
Алатай асирдин 80-йисара, лап дуьзди 1978-йисуз рагьметлу Имамали Илясова вичин регьбервилелди Хьиле арадал гъайи фолклордин ансамблдин тIварни гьа идаз килигна "Мел" эцигна.
Гилан несилриз Имамали Илясов акьван хъсан чидач. Анжах рикIел хкун суваб кар я: Имамали муаллим лугьуз тежер кIван сая, вичихъ артиствилин алакьунар, хъсан ван, халис лезги акунар авай кас тир. Ада яргъал йисара КцIарин, Хьилерин културадин кIвалера, чи театрда кIвалахна, рикIел аламукьдай образар ярятмишна. "Мелни" Имамали муаллимдин чи несилдиз са аманат я.
Адалай гуьгъуниз Хьилерин хуьруьн Културадин кIвалин, гьакIни "Мелдин" кьиле чи сейли сеняткар, саки вири уьмуьр културадиз бахш авур Эмрулла Залов акъвазна. Шак авачиз, ам и фолклордин ансамблдин тешкилатчини хьана, муаллимни, гьиле тар авай солистни. Ада "Мел" мадни гурлу авуна, ам   хуьуруьн, райондин межлисрилай башламишна республикадин конкурсриз кьван акъудна.
1988-йисан майдиз республикадин Културадин Министерстводи ва културадин кIвалахдаррин республикадин профсоюзди хуьруьн културадинни просвешениедин карханайрин кIвалахдиз обшественный килигунриз итог янай. Нетижада "Мел" фолклордин ансамблни гъиляй-гъилиз фидай Яру пайдахдиз ва 400 манат пулдин пешкешдиз лайих акунай.
Эмрулла муаллимди эстафета Хуьземмед Пашаевал ихтибарна.
-За и везифа 2011-йисуз кьабулна-лугьузва ада-Анжах културадин хьиле, "Мелдик" 1982-йисалай зегьмет чIугвазва. "Мел" фолклордин ансамбл саки вични яргъал йисаралди давамзавай са мел я: адан къене вишералди хьиливи рушани, гадади, кьуьзекани, къариди иштиракнава, мадни хъийизма. Сифте нубатда чи сейли солист Гевилагъа баде рикIел хкана, Аллагьди адаз рагьметрай лугьуз канзава заз. Къе адан чка яшлубурукай Изажеддин ва Зейнаб Дурахановри, кIвалин кайвани тир Бике Исрафиловади кьунва. ГьакIни Умуд Бабаева, Икрамеддин Исрафилова, Фергьад Пирвелиева, Майисе Магьсимовади, Зенуре Бабаевади, Лимане Лачыновади, Седакъет Серкеровади "Мелен" концертра мукьувай, ашкъидив иштиракзава.
Азербайжанда “Мултикултурализмдин йис” баянарнавай 2016-йисуз КцIар республикадин “Фолклордин Меркез” хкягънава. ЦIининдалай чи ва гьакIни са шумуд културадин макандиз "Фолклордин кIвал" тIвар ганва. Чна им чIехи ихтибардин ва жавабдарвилин лишан гьисабзава.
Са бязи чкайрал япарик "фолклор вуч я э..." лугьудай ванерни галукьда-"Ам накьан югъ тир..." лугьуда. Чир хьун герек я: накьан югъ, тарих авачирдахъ, пакад югъ, гележегни жедайди туш.
Дуьз гафуниз вуч лугьун? Гьайиф хьи, къе чахъ мелер амач. Гьадаз килигна са мягьледивай, хуьруьвай вичин цин хвал, булах туьхкIуьриз, рехъ къайдадиз хкиз алакьзавач...    
Меле рушаринни, гадайринни алакьунар виридаз аквадай. Меле акуна бегенмиш хьайи рушакай кIвалин халисан свас жедай. Къе гзаф межлисра хайи чIалал са бенд баяд лу-   гьудай, са аваздал илигдай, юкьвал акъатна кьуьлеруник экечIдай жегьил жагъизвач. ГьакI хьайила, “Мелез" килигна мелерал чан хкин чна. Мел шадвал я, мел садвал, рузи-берекат, чи кIвалерин хуьрерин аваданвал я!

"Кцlар" газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.