Перейти к основному содержанию

Элнара Ризванова

Ризванова Элнара

Ризванова Элнара Азадан руш 1995-йисуз КцIара дидедиз хьана. КцIара Лезги Няметан тIварунихъ галай юкьван мектеб акьалтIарна Бакуда Техникадин Университетда кIелзава. Лезги, азербайжан, урус, ингилис чIалар михьиз чизвай и викIегь руша франсуз чIални чирзава. Са шумуд чIалал шиирар кхьизвай Элнара чи чIехи шаир Забит Ризванован стха Арзуманан хтул я. Адан илимдин макъалаяр ктабриз акъатнаватIани, поэзиядин сифте кам «АЛАМда» вегьизва. Ваз мадни агалкьунар, Элнара!

Эйваз Гуьлалийрин

Вири вид я

Са сеферда зун,
Зи бубад галаз
Фенвай кIамариз
Кулар хчализ.
КIунтIунал кьакьан,
Акьвазнавай чун. 
Са кIус ял ягъаз,
Тек амукьна зун.
И къалин тама,
Са кьакьан тара
Амукьна фикир.
Бубад гъил кьуна,
Жузуна эхир:
-И там Буба гьидан я,
РапIрапI гузва чаз?
-Вид я бала, вид,
Бахшзава за ваз!
Хъвер хьана чинал 
Хвеши хьана заз.
Вил вегьена шад 
Жузуна за мад:
- Буба, и дагъ гьидан я, 
Живедин кIукI квай?
-Вид я бала, вид я!
Бахшзава за ваз!
-Бес им? Бес ам? Анагар?
Агь! И иер чкаяр!
Бубади икI лагьанай:
- Чан бубадин кукупI руш,
Чин рагъ хьтин рикIиз хуш.
Ви вилериз аквазавай,
Ви рикIиз вуч кан ятIа,
Вири вид я, вири вид!
-За, ваз бахшзава !!!

Килига

Дамах аку чуьллерин,
Дамах аку цуькверин,
Дамах аку цаварин
Вили, иер наварин.
Дамах аку гвай чилив,
ЧIугванвай хьиз зи гъилив.
Дагъдал алай мурк аку,
Чаз серин йикъар гайи.
Яргъи рушан мугъ аку
Жуьреба рангар гъайи!

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.