Гьар ктаб са вакъиа я

Лезги Нямет

Са береда чи тIвар-ван авай шаир Лезги Нямета лагьанай: «Шаирар рекьидач.» ГьакIни я. Хъсан шаирри чпин дуьнья дегишарайдалай кьулухъни абурун тIварарни цIарар мецел къведа. Лезги Няметни гьа ихьтин рикIелай тефир къелемэгьлийрикай я. 
И йикъара Бакудин «Азербайжан» чапханади адан «Хкягъай эсерар» тIвар ганвай ктабдин I жилд чап авун шаир рикIелай ракъур тавунин лишан я. Ктабдин редактор Камран Аламви, ам туькIуьрна сифте гаф кхьейди филологиядин илимрин кандидат, шаир Азиз Мирзебегов я. Вич сагъ амаз Лезги Няметан Бакуда «Дагълара» (1964), «БембецI» (1966), «Зегьметдикай баядар» (1975), «Зи хиялар» (1984) тIварар ганвай кьуд ктаб чап хьанай. Рагьметдиз фейидалай кьулухъ Магьачкъалада шаирдин «Шиирар» (1992) ктаб басма хьана.
Вичин уьмуьр халкьдин четин кьисмет кьезил авуниз, адан милли къанажагъ ва ватанпересвилин руьгь хкажуниз серф авур Лезги Нямет женгчи шаир тир. 1959-йисуз КцIар шегьерда чи машгьур шаир ва камалэгьли Забит Ризванов кьиле аваз арадал атай «РикIин гаф» эдебиятдин кIватIалдик кваз ада халкь паталди чIугур кьван зегьметар садрани рикIелай фидач. Девирдин залан шартIаризни вичиз гузвай басрухриз килиг тавуна ада 1976-йисалай «РикIин гаф» кIватIалдиз регьбервал ганай. Са шумуд йисан къене кIватIалдиз цIийи къуватар – жегьил шаирарни кхьирагар желбнай. Районда поэзиядин нянияр тухванай, лезги чIал, эдебият, меденият теблигънай. Гьавиляй коммунист режимди вичиз басрухар ганай. Гьа и кар себеб яз начагъ хьайи шаирди 1986-йисан 9-январдиз вичин дуьнья дегишарнай.
Ктабда шаирдин алатай асирдин 50-80-йисара кхьенвай шиирар гьатнава. Ибур сиясатдин, сатирадин ва лирикадин чIалар я. Шаирди хайи ватандиз, тIебиатдиз, муьгьуьббатдиз, дустариз бахшнавай шиирар рикIелай тефидайбур я. Ктабда гьатнавай «Дагълара» поэмади ва манияр патал кхьенвай шииррини кIелдайбур чпихъ ялзава.
Лезги Нямета вичин 1971-йисуз къелемдиз къачур «Шаирар фад рекьида» шиирда кхьенай:

Шаирар фад рекьида.
Дагъ рекьидач. Ваъ.
Шаирар фад рекьида.
Рагъ рекъидач. Ваъ.
Шаирар фад рекьида,
Ваъ! Рекьидач шаирар.
Чилни, цавни рекъида,
Гьич садрани рекьидач
Эл паталди абуру кхьей
Даим дири шиирар!..

Гьакъикъатдани, Лезги Нямет хьтин чIехи шаирар рекьидач. Абуру эл паталди кхьей шиирар гьамиша дири яз амукьда. Абурун чIалари халкьдик руьгь кутада. Абурун шиирралди халкьди дамахда.

Самур газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.