Хайи вацl

Кукlушрай на къачур бине,
Виридлай заз язва вине.
Акl я хьи заз дидед гине
Авайди хьиз куьгьне пине,
Гъуцари чаз гайи вацl,
Зи хайи чил, хайи вацl.
 
Садзамач хьи, Къуба, Куьре,
Чlал амач хьи, лезги хуьре.
Ягъийрин кlуф хьанва гъуьре,
Къилихар гвай шумуд жуьре,
Рикlериз тlал гъайи вацl,
Зи хайи чил хайи вацl.
 
Кьулан вацlув - чун кьулаба,
Пайиз туна хуьрни уба.
Авай кlус фу нез кьураба,
Бинеди гьикl хуьй къураба?
Лезги эл хьиз кайи вацl,
Зи хайи чил, хайи вацl.
 
Чи жаллатlри бахт кьурурай,
Халкьдин кьисмет бес гьикl хьурай?
Жаваб це заз квахьай кьарай,
Им язва зи руьгьдин гьарай.
Рикlе дердер цайи вацl,
Зи хайи чил, хайи вацl.
 
Атанва зун мад ви кьерел,
Ифин алаз чандин хирел,
Ацукь хьана зун кьве метlел,
Рикlин гафар къвезва мецел,
Халкь кьве патан хьайи вацl,
Зи хайи чил, хайи вацl.