Вун атайтIа

Эгер, яр, вун атайтIа,
Ша гатфарин рагъ хьана,
Ачух гуьзел мензера,
Бул емишдин багъ хьана.
Вун атайтIа эгер, яр,
Гатун рагъ хьиз агата,
Экуь гуьрчег ярарай,
Хважамжам хьиз хката.
Ша духтур хьухь давадин,
Эбеди яз зулуз, яр,
Кьезил михьи гьавадив,
Алаз пелел нехиш - зар.
ХъуьтIуьн мекьи къаярив,
Экуь юмшагъ рикI гваз ша,
ГъвечIи рикIин паярив,
Ватанда хьиз чим гваз ша.
Вун атайтIа йифиз, яр,
Азаддиз ша Варз хьана,
Зуьгьре гъетрен михьи тIвар,
Гьуьруьперид тай хьана.
Къурбандда ваз рикI, вири,
Муьгьуьббатдин луварив,
Герек туш заз мад гъейри,
Маса пери суварик