Алатай гьафтедин хемис юкъуз Кьасумхуьрел Россиядин халкьарин адетдин культурадин Центрадин дараматда Сулейман-Стальский районда Литературадин йис официальнидаказ ачухаруниз талукьарнавай мярекат кьиле фена. Ана алимри, шаирри, общественный деятелри, муаллимри, библиотекарри, школьникри иштиракна. Гьуьрметлу мугьманрин арада филологиядин илимрин доктор, шаир Фейзудин НАГЪИЕВ, тарихдин илимрин кандидат, шаир публицист Ризван РИЗВАНОВ, филологиядин илимрин кандидат, шаир Азиз МИРЗЕБЕГОВ, технический илимрин кандидат Айдин БАЛАБЕГОВ, “Самур” журналдин къуллугъчи, шаир Зульфикъар КЪАФЛАНОВ, “Лезги газетдин” векилар, шаирарни писателар тир Сажидин САИДГЬАСАНОВ, Абидин КАМИЛОВ, Агьмедпаша АГЬМЕДПАШАЕВ, Нажмудин ШИХНАБИЕВ ва масабур авай.
Литературадин йисаз талукьарнавай мярекатдин сергьятда аваз Кьасумхуьрел шадвилин гьалара край чирдай музей ачухна. Ам арадал гъунин кьилин макьсад Россиядин, Дагъустандин, хайи ерийрин тарих хуьникай ва саламатдиз акьалтзавай несилрив агакьаруникай ибарат я.
Музейдин куьмекдалди чкадин агьалийривай ва мугьманривай Сулейман-Стальский райондин тарихдихъ, машгьур векилрин - общественный деятелрин, магьир устадрин, спортсменрин, алимринни шаиррин уьмуьрдин ва яратмишунрин рекьихъ галаз мукьувай таниш жеда. Гуьгъуьнлай мярекатдин иштиракчияр Россиядин халкьарин адетдин культурадин Центрадин актовый залда кIватI хьана.
- Къенин мярекатдихъ чIехи шаир СтIал Сулейманан тIварунихъ галай район патал еке важиблувал ава, къейдна райондин кьил Нариман Абдулмуталибова литературадиз бахшнавай межлис ачухдайла. - Виридаз малум тирвал, СулейманСтальский район шаирринни алимрин макан я. Лезги писателрин Союздин виридалайни чIехи отделение “Куьредин ярар” ина ава. Алай вахтунда районда яратмишдай пай ганвай инсанрин кьадар 70-дав агакьзава. Шад жедай кар ам я хьи, абурун жергейра жегьил къуватарни ава.
Райондин руководстводи лезги литература вилик финик лайихлу пай кутур, кутазвай векилрин ктабар чапдай акъудунизни кьетIен фикир гузва. Алай йисуз ЧIехи Гъалибвилин 70 йис тамам хьунихъ галаз алакъалу яз чахъ Ватандин ЧIехи дяведа телеф хьайи шаирар тир СтIал МУСАИБАННИ Балакъардаш СУЛТАНОВАН яратмишунрин уртах кIватIал гьазурдай фикирар ава. Идахъ галаз сад хьиз, чIехи шаир Рухун АЛИДИН сур алай чкадал гуьмбетни эцигда. Мадни, ЧIилихъ АБДУЛГЬАМИДАН, Мехкергъай тир Къазимегьамеданни Шихмегьамедан гьат хъувунвай эсерар идалай вилик басмадиз акъатнавайбурухъ галаз садна, кьилдин ктаб акъудун планламишнава. Литературадин йисан сергьятра аваз цIи райондин хуьрерин школайра, библиотекайра мярекатар мадни кьиле тухуда, - лагьана Н.Абдулмуталибова.
Сулейман-Стальский райондин кьилин гафарай малум хьайивал, алай йисуз Дербентда лезги халкьдин кьегьал хва Имам ЯРАЛИЕВАН куьмекдалди “Алпан” тIвар алаз лезгийрин культурадиз, литературадиз ва тарихдиз талукь тешкилат арадал гъанва. Идалай гъейри, гьа ихьтин тIвар алаз цIийи журнални чапдай акъатдайвал я. Тешкилатдин кьилени чи машгьур ватанэгьли Ризван Ризванов акъвазнава. Вичин рахунра ада лезги эдебиятдин умумивиликай гегьеншдиз ихтилатна. - Лезги эдебиятдиз амайбурулай тафаватлу яз кьилдин кьетIенвал хас я: чи эдебият са чешнедай акъатна кьве патахъ авахьзавай цин селлериз ухшар я, - къейдна Р.Ризванова. - Адахъ къадим бинеяр ава. Лезги эдебиятдин дувулар VII асирда яшамиш хьайи Давдакьалай гатIунзава. Гьикьван чапхунчийри гьужумнатIани, жуьреба-жуьре девирра хейлин татугайвилерни четинвилер хьанатIани, лезгийрилай виридалайни важиблу руьгьдин ивиррин - медениятдинни эдебиятдин сенгерар, умумивал хуьз алакьна. Гьатта къенин юкъузни чаз икьван чIавалди чпикай ерли хабар авачир шаиррин яратмишунар жагъизва. И карди мад сеферда лезги эдебиятдин къадимлувиликай, девлетлувиликай лугьузва, алава хъувуна Р.Ризванова. Мярекатдал литературади акьалтзавай несилар тербияламишунин карда къугъвазвай ролдикай Фейзудин Нагъиева, хайи чIал хуьнин ва вилик тухунин месэлайрикай Зульфикъар Къафланова, инсаният, жемят патал литературадихъ авай къуватдикай Азиз Мирзебегова итижлу суьгьбетар авуна.
Мярекатдин иштиракчийриз Литературадин йис мубарак авуналди шаирар тир Сажидин Саидгьасанова, Абидин Камилова, Муса Агьмедова, Мегьамед Ибрагьимова, Ражуллагь Салманова, жегьил къуватри – Дагъустандин политехнический колледждин студентка Зарина Мустафаевади, Агъа СтIалрин-Къазмайрин юкьван школадин 11-классдин ученица Цуьквер Абдулаевади ва масабуру шиирар кIелна. Сулейман-Стальский райондин администрациядин культурадин отделдин къуллугъчийри ва са жерге школайри гьазурнавай музыкадинни сегьнеламишнавай нумрайри межлис мадни гурлу авуна.
Шагьабудин ШАБАТОВ,
Муса АГЬМЕДОВ,
Мегьамед ИБРАГЬИМОВ
Лезги газет
Добавить комментарий