Перейти к основному содержанию

Сенгер хьана...

Варз алай йиф. Секин хьиз я Лезгистан,
Самурди чаз гъамлу ширшир  ийизва.
Са мус ятIан межлис хьтин гур Ватан,
Гуя вацIу несилриз вяз кхьизва.

Пашмандаказ рахазва зав Кьулан вацI,
Симерикай къерехар-цаз хранвай.
Къисметди язава къе зи рикIиз  кьацI,
Лезгистандин рикIяй сенгер атIанвай.

СДК-дин муькъвел гужлу эквери,
Чи рикIерив чIулав гьижран вугузва.
Машинрин бул цIиргъер акваз гьиссери
Язухбурун гьарайдал чун тухузва.

Чи машинни агатзава постунив,
Ргазвай худ кул янавай куьнуь хьиз.
Багъри акваз физ кIанибур къастунив,
Жуван чилел кьабулзава гъейри хьиз.

Ван къвезва чаз аял кIевиз шехьзавай,
Дидедивай жезвач бицIек секинриз,
Адан меци гьахъсузвилер негьзавай,
Ялвар ийиз цавуз, вацран экуьниз.

- Я чан стха, бес нинди я аял и,
Зи ухшарар кьатIузвачни на чинин.
Зун диде я, ша пис жемир хиял ви,
Чараданди зав вучиз хьуй, гьинай гъин?

- Чаз тестикьдай справка гъваш  алахъиз,
Япар денгмир, чуьнуьхначтIа низ чида?
Патахъ къекъечI, манийвалмир  кIвалахиз,
Физ кIан ятIа, документни на гъида!...

Садни кьвед ваъ, са шумудар бейгьал яз,
СДК-дин постуналла гьар юкъуз.
Жуван хайи чил къе жуваз гьарам яз,
Сергьятчийрин гъиле гьатна, “Ваъ!” - лугьуз.

“Къизилдин муьгъ” тIвар эцигнач  гьавайда,
Харж къачузва постунал гьар алайда.
Гуда гьелбет, кIани кьван гуж авайда,
Вуч авурай кьуру жибин галайда?

Сенгер хьана муькъверални рекьерал,
Энгел хьана жуван кIвализ хъфирбур.
Гьайифди куз нагъв акьалтна вилерал,
Чеб чарадан рикIинал гьич  тефирбур.

Стхадиз чун мугьман жедай  жигъирар,
Хъач акьалтна кIвачин гелер квахьзава.
Вужар жеда алатайла девирар, 
Зи лезги халкь, гьи асирдиз гьахьзава?!

Гьикьван хьурай са гьахъ-дуван  авачиз,
Падна са рикI гьар пад санихъ чара яз?!
ГьикI хьуй беден, бегьем са пад галачиз,
Лезги халкьдин дердерин сан хара яз?!

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.