Лиф къугъвазва дакIарда

Са лацу лиф дакIардив гва атана,
Яраб адав салам гватIа зи ярдин.
Ада вичин назик кIуфал гатана,
Агакьарна хабар зав ви ялвардин,
Рахазва хур, са вуч ятIан лугьузва,
Гъамлувилин, сугъулвилин пай  ятIа.
И хабарди зун Самурдал тухузва,
Лифренди заз ви эвердин гьай ятIа.
Къуш хьанайтIа хупI туширни  легьзеда,
Ви эвердиз гьерекатдай Самурдал.
Чара кас я зун и мублагь сегьнеда,
Дамахзава гьахълу яз ви абурдал,
Ви вилерин хуш килигун кIанда заз,
Эверзавай муьгьуьббатдин сел аваз,
Вун ракъинив лап гекъигун  кIанда заз,
РахайтIани ара-ара хъел аваз.
Лиф рахазва, лиф къугъвазва дакIарда,
Зи саламдин кIанзаватIа чар тухуз,
Гуьзел, и къуш гьахьзава зи къагьарда,
КIанзаватIа ви патай са гаф лугьуз.
Кузва зи рикI гьахьайтIани живеда,
МетIерихъ кьван хкаж хьанвай чилелай,
Сугъул я заз и гьуьрметрин чиледа,
Ийизвай заз алакьдайвал чпелай.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.