Чун дяведин веледар тир

Чун дяведин веледар тир,
Къуй несилриз чир хьуй и кар.
Телеф хьанвай бубайрихъ чи
Кьуранвач чи вилин накъвар.
Пайиз хьанай чрай картуф,
Фуан капни жедай уртах.
РикI тIар хьана лагьанач уф,
ГъвечIизамаз жедай уях.
Маса чара авачир чаз,
Чун дяведин веледар тир.
РикIер гегьенш, каша лигим,
Вуч жедай кьван? Дуьнья дар тир.
Пуда-кьуда са ктабдай
Дуствилелди чирдай тарсар.
Сада садан дерт къачуна,
Рекье твадай атай йикъар.
Эхна кашни, мекьни эхна,
Тарсарикай хьанач кьулухъ.
Зегьметдани хьана лигим,
Хуьре, кIвале хьанач шулугъ.
Чун дяведин веледар тир,
Къуй несилриз чир хьуй и кар.
Телеф хьанвай бубайрихъ чи
Кьуранвач чи вилин накъвар.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.