Кьве гъил

Кьве гъил! Кьве гъил намуслу тир инсандин,
Куьне чилел гьахълу рекьер туькIуьрна.
Кьве гъил, куьне хайи чилел душмандив
КIвач эцигиз тунач. Куьне куькIуьрна
И дуьньядал азадвилин фонарар.
Кьве гъил, гзаф чIехи я куь гьунарар!
Ингье кьве гъил Ватан хвейи цIаяра,
Кьуна яракь, душманд рекьел цIай хьайи,
Къенин стхавилин крара
Халкьдиз вири девлетрикай пай гайи,
Чун паталди цIузни-вацIуз фейидан
И гъилериз чна икрам ийида.
Ингье кьве гъил, кьве гъил гишин халкьариз
Фу гайи, чан эцигна ам кIватI авур.
Къурбанд я чун и кьве гъилин крариз,
Чи ажалдин зунжурар кьатI-кьатI авур,
Хъвер чукIурай баябан тир чуьллериз,
“Яшамишрай!” - лугьуда и гъилериз.
Ингье кьве гъил, хва чIехивур Ватандин,
Вичин чанни адан рекье эцигна.
И кьве гъили рехъ къалурна инсандиз,
И кьве гъили чун уьмуьрдив гилигна,
И гъилерин къимет чир хьухь, инсанар!
И гъилерин девлет чир хуьхь, инсанар!
Ингье кьве гъил, чумахъ кьуна дагълара
Хуьзвай халкьдин девлет - чIехи суьруьяр.
И гъилерин гьунарар къе яргъара
Машгьур я. Къайи тIурфанни кваз къуьруь я
И гъилерин вилик. Гьа и гъилериз
Буржлу я чун, дамах тир чи эллерин.
Ингье кьве гъил, намуслу тир инсандин,
ЦIийи рекьер туькIуьрзавай алемда.
Ингье кьве гъил, къуллугъзавай Ватандиз,
И гъилерин гьунар гьакьдач къелемда.
Артух хьурай и гъилерин гьунарар,
Цавун аршдик кутазвай къе гурарар.
Кьве гъил! Кьве гъил намуслу тир инсандин,
Куьне чилел гьахълу рекьер туькIуьрна.
Куьне чара авуна пис, хъсанди,
Куьне чилел азадвал - экв куькIуьрна.
Дуьз мисал я: ван ийидач са гъили!
Анжах тек кьве гъилин гьунар я вири!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.